കരസേനയിൽ അഗ്നിവീർ

പരീക്ഷ ആദ്യഘട്ടം അപേക്ഷാഫീസ് 250 രൂപ യോഗ്യത: എട്ടാംക്ലാസ്/ പത്താംക്ലാസ്/ പ്ലസ് ടു വിജയം

കരസേനയിൽ 2023-24 വർഷത്തെ അഗ്നിവീർ സെലക്ഷൻ ടെസ്റ്റിന് ഇപ്പോൾ അപേക്ഷിക്കാം. ജനറൽ ഡ്യൂട്ടി, ടെക്നിക്കൽ, ക്ലാർക്ക് സ്റ്റോർ കീപ്പർ ടെക്നിക്കൽ, ട്രേഡ്സ്മാൻ (പത്താംക്ലാസ് വിജയിച്ചവർ), ട്രേഡ്സ്മാൻ (എട്ടാംക്ലാസ് വിജയിച്ചവർ) എന്നീ വിഭാഗങ്ങളിലേക്കാണ് അഗ്നിവീർ തിരഞ്ഞെടുപ്പ്. അഗ്നിവീർ ജനറൽ ഡ്യൂട്ടി വിഭാഗത്തിലേക്ക് (വിമൻ മിലിട്ടറി പോലീസ് വനിതകൾക്കും അപേക്ഷിക്കാം. നാല് വർഷ സേവന കാലയളവിലേക്കായിരിക്കും നിയമനം. കരസേന റിക്രൂട്ട്മെന്റ് റാലിക്ക് ആദ്യഘട്ടത്തിൽ കംപ്യൂട്ടർ അധിഷ്ഠിത പൊതുപ്രവേശന പരീക്ഷ നടത്തുന്നുവെന്ന പ്രത്യേകതയോടെയാണ് ഇത്തവണ വിജ്ഞാപനം പ്രസിദ്ധീകരിച്ചിട്ടുള്ളത്.

യോഗ്യത

ജനറൽ ഡ്യൂട്ടി: 45 ശതമാനം മാർക്കിൽ കുറയാതെയുള്ള പത്താംക്ലാസ് വിജയം. ഓരോ വിഷയത്തിനും കുറഞ്ഞത് 33 ശതമാനം മാർക്ക് നേടിയിരിക്കണം. എൽ.എം.വി. ഡ്രൈവിങ് ലൈസൻസ് ഉള്ള വരെ ഡ്രൈവറുടെ ഒഴിവിലേക്കും പരിഗണിക്കും.

ടെക്നിക്കൽ ഫിസിക്സ്, കെമിസ്ട്രി, മാത്തമാറ്റിക്സ്, ഇംഗ്ലീഷ് എന്നിവയുൾപ്പെടുന്ന ഗ്രൂപ്പിൽ 50 ശതമാനം മാർക്കിൽ കുറയാത്ത പ്ലസ് ടു  വിജയം. ഓരോ വിഷയത്തിനും കുറഞ്ഞത് 40 ശതമാനം മാർക്ക് വേണം. അല്ലെങ്കിൽ ഫിസിക്സ്, കെമിസ്ട്രി, മാത്തമാറ്റിക്സ്, ഇംഗ്ലീഷ് എന്നിവയുൾപ്പെടുന്ന ഗ്രൂപ്പിൽ പ്ലസ് ടു വിജയവും ഒരു വർഷത്തെ ഐ.ടി.ഐ. കോഴ്സും.

അല്ലെങ്കിൽ 50 ശതമാനം മാർക്കിൽ കുറയാത്ത പത്താംക്ലാസ് വിജയവും രണ്ട് മൂന്ന് വർഷം ദൈർഘ്യമുള്ള ഐ.ടി.ഐ. ടെക്നിക്കൽ ട്രെയിനിങ് ഡിപ്ലോമയും.