படம் ரிலீஸ்! மாநாடு...? அப்செட்டில் விஜய்!

விஜய்யின் 'கோட்' திரைப்படமும், அதைத்தொடர்ந்து நடக்கவிருக்கும் விக்கிரவாண்டி மாநாடும் தமிழக அரசியலில் பெரிய பரபரப்பை ஏற்படுத்தியிருக்கிறது.

- தாமோதரன் பிரகாஷ், துரை.மகேஷ்

'கோட்' திரைப்படம் பெரிய அளவில் வசூலைக் குவித்திருக்கிறது. திரைப்படம் வெளிவருவதற்கு முன்பே படத்தைப் பற்றி பெரிய பில்ட்அப் கொடுத்து, படத்தை தயாரித்த கல்பாத்தி அகோரம் கம்பெனி 600 கோடிக்கு படத்தை விற்பனை செய்திருக்கிறது.

தமிழ் திரையுலகின் அசைக்கமுடியாத ஒரு நடிகராக வலம்வரும் விஜய், தமிழகம் மட்டுமன்றி, மற்ற மாநிலங்களிலும், வெளிநாடுகளிலும் தனக்கென ஒரு ரசிகர் பட்டாளத்தை ஈர்த்து வைத்துள்ளார். நீண்ட நாட்களாக அவர் அரசியலுக்கு வரவேண்டும் என்று ரசிகர்கள் கோரிக்கை வைத்திருந்தாலும், பல ஆண்டுகளுக்குப் பிறகு கடந்த பிப்ரவரி மாதம் 'தமிழக வெற்றிக் கழகம்' எனும் கட்சியை தொடங்கினார். நடிகர் விஜய் கட்சி அறிவிப்பை வெளியிட்ட நாளிலிருந்து ஒட்டுமொத்த அரசியல் தலைவர்களின் கவனமும் அவர் மீது திரும்பியது. அரசியலில் ஈடுபட்டு வரும் பல கட்சிகள் விஜய் நமக்கு ஆதரவளிப்பாரா என்று எதிர்பார்த்திருந்த நிலையில்... அவரே ஒரு கட்சியை ஆரம்பித்திருப்பது பெரும் ஆச்சரியத்திற்கு உரியதாக மாறிவிட்டது.

அவர் கட்சி ஆரம்பித்த சில மாதங்களிலேயே மாநில அளவிலான மாபெரும் மாநாட்டை நடத்த திட்டமிட்டு, அதற்கான ஆயத்த பணிகளில் இறங்கியது... அரசியல் கட்சி தலைவர்களுக்கு அடுத்த அதிர்ச்சியைத் தந்தது. சமீப காலமாக விஜய் எந்த மேடையில் பேசினாலும், மாநில உரிமைகள் குறித்தும், நீட் தேர்வு குறித்தும், வருகின்ற 2026 தேர்தலை நாம் எப்படி எதிர்கொள்ளப்போகிறோம் என்பது குறித்தும் தான் பேசுகிறார்.

இந்நிலையில், தன்னுடைய முதல் மாநாட்டை திருச்சியில் நடத்தலாம் எனத் திட்டமிட்ட விஜய், மதுரை, சேலம் என பல மாவட்டங்களில் மாநாடு நடத்துவதற்கான மைதானம் கிடைக்கவில்லை. இறுதியாக விழுப்புரம் மாவட்டம் விக்கிரவாண்டியில் மாநில மாநாட்டை நடத்த முடிவு செய்து செப். 23 ஆம் தேதி மாநாடு நடைபெறும் என்று தேதியும் அறிவிக்கப்பட்டது.

இந்த மாநாட்டின் பணிகளை கட்சியின் பொதுச்செயலாளர் புஸ்ஸி ஆனந்த் முன்னின்று செய்துவரும் நிலையில், மாநாட்டிற்கான அனுமதி பெறவேண்டி விழுப்புரம் மாவட்ட கூடுதல் காவல் கண்காணிப்பாளரிடம் மனு அளித்தார்.