அதிகாரிகளின் சதுரங்க வேட்டை! -முதல்வர் நடவடிக்கை எடுப்பாரா?

தொழில் வளர்ச்சியில் நாட்டிலேயே முதன்மையான மாநிலமாக தமிழ்நாட்டை முன்னிறுத்தும் முயற்சியில் முதல்வர் ஸ்டாலின் சுறுசுறுப்பாக இறங்கியிருக்க, சில முக்கிய அதிகாரிகளோ, இங்கு தொழில் துவங்க வரும் வெளிநாட்டு நிறுவனங்களுடன் கோர்த்து காசு பார்க்கத் துவங்கியிருப்பதாகக் கசியும் தகவல்கள், கோட்டை வட்டாரத்தில் புயலைக் கிளப்பத் துவங்கியிருக்கின்றன.

- துரை.மகேஷ்

தமிழகத்தில் முன்னெப்போதையும் விடத் தற்போது தொழில் வளர்ச்சி அதிகரித்துள்ள நிலையில் தான், தமிழ்நாடு மாநிலத் தொழில் மேம்பாட்டுக் கழகமான சிப்காட் மூலம் தொழிற்சாலைகள் அமைக்க நிலம் ஒதுக்கப்படும் விவகாரத்தில், முதல்வருக்கே தெரியாமல் அதிகாரிகள் சிலர் குதூகலம் அடைந்து வருவதாகப் பரபரப்பான தகவல் கசிந்து வருகிறது.

பொதுவாக, எந்தவொரு நிறுவனமும் தமிழகத்தில் தொழில் தொடங்க முன்வந்தால், அது குறித்து அமைச்சரவைக் கூட்டத்தில் ஒப்புதல் வழங்கப்படுவது வழக்கம். அப்படியொரு கூட்டமானது அக்டோபர் 8ஆம் தேதியன்று முதல்வர் ஸ்டாலின் தலைமையில், தலைமைச் செயலகத்தில் நடந்தது. துணை முதல்வர் உதயநிதி ஸ்டாலின், நிதியமைச்சர் தங்கம் தென்னரசு உட்பட அமைச்சர்கள் பலர் கலந்துகொண்ட அக்கூட்டத்தில், 38,698 கோடிகள் முதலீட்டில் 14 நிறுவனங்கள் இங்கு தொழில் துவங்குவதற்கு ஒப்புதல் அளிக்கப்பட்டது. அதில்தான், அரியலூர் மாவட்டத்தில் அமையவுள்ள ஒரு வெளிநாட்டு நிறுவனத்திற்கு மட்டும் சலுகைகளை வாரி இறைத்து, அதன்மூலம் சில அதிகாரிகள் வளமடைந்துள்ளதாகக் குற்றச்சாட்டு எழுந்துள்ளது.