బాల్యంపై గాజా నెత్తుటి మరకలు

డబ్బున్నవాడు ఎప్పుడూ నిరుపేదలపైనే దాడులకు ఉసిగొల్పుతాడు. బలవంతుడు బలహీనుడుపైనే తన ప్రతాపాన్ని చూపిస్తుంటాడు.

- -వి.వి.వెంకటేశ్వరరావు, 6300866637

ఈ భీకరపోరు ఘటనల నుండి చిన్నారులు బయటపడేదెప్పుడో?

డబ్బున్నవాడు ఎప్పుడూ నిరుపేదలపైనే దాడులకు ఉసిగొల్పుతాడు. బలవంతుడు బలహీనుడుపైనే తన ప్రతాపాన్ని చూపిస్తుంటాడు. అదే నిరుపేద కి కడుపు మండి తిరగబడితే తట్టుకునే శక్తి ఆ ధనవంతుడికి ఉండదు. పేదవాడు ఎక్కడ తిరగబడతాడో అన్న మానసిక భయంతోనే తన ఆధిపత్యాన్ని కొనసాగించేందుకే ఈ దాడులు. ఇజ్రాయెల్ గాజాపై దాడులు చేయడాన్ని కూడా ఒక కోణంలో చూస్తే అదే అర్థమవుతుంది.ఇజ్రాయెల్ సైనిక దాడుల్లో లిగాజా నగరం గజగజలాడింది. ఎప్పుడు ఎక్కడ ఏం జరుగుతుందో తెలియని నిస్సహాయ పరిస్థితుల్లో గాజా ప్రజలు వణికిపోయారు. చర్చలతో సాధించుకోవాల్సిన ఇరు దేశాల సత్సంబంధాలు రాకెట్ దాడుల వరకూ వస్తే అక్కడి ప్రజల స్థితిగతులు ఏంటన్నది ఎవరు ఆలోచిస్తారు..? గాజాలో అనాథలుగా వేలాది మంది చిన్నారులు శరీరంపై గాయాలతో, ఆకలి మంటలతో... ఒంటరితనంతో ఎంత కష్టంగా బతుకుతున్నారంటే.. దీనికి కారకులు ఎవరు..? ఏదైనా దేశంలో శతృవులను మట్టుబెడితే మానవ హక్కులు మంటగలిసి పోతున్నాయంటూ నెత్తీనోరూ బాదుకునే హక్కుల నేతలు గాజా దాడుల్లో బాలల శరీరంపై కనిపించే గాయాలు కాదు.. పసి హృదయాలు మరచిపోని తీవ్ర ఘటనలపై ఇప్పుడు గొంతెత్తాల్సిన అవసరం ఎంతో ఉంది.