అన్నం పెట్టే చేతులకు హత్కడీ..!

దశాబ్ది ఉత్సవ వేళ రైతులకు బేడీలు • చేతులకు బేడీలతో భువనగిరి కోర్టుకు

దశాబ్ది ఉత్సవ వేళ రైతులకు బేడీలు

• చేతులకు బేడీలతో భువనగిరి కోర్టుకు

• భూములు కోల్పోతున్న రైతుల ఆందోళనపై తెలంగాణ సర్కార్ ఉక్కుపాదం

• కేసులు పెట్టి జైళ్లో తోసిన కేసీఆర్ ప్రభుత్వం 

• ట్రిపుల్ ఆర్ బాధితులకు బీఆర్ఎస్ కానుక

• మే 30 మంత్రి జగదీశ్ రెడ్డి కాన్వాయ్ అడ్డగింత 

• అరెస్టు చేసిన పోలీసులు.. 14 రోజుల రిమాండ్

• ప్రభుత్వ తీరుపై తీవ్రంగా మండిపడ్డ కోమటిరెడ్డి

ప్రపంచంలో మోసపోవడమే తప్ప మోసం చేయడం తెలియని వాడు రైతు.. ఐదు వేళ్ళు కూడా నోటిలోకి వెళ్ళడానికి అలమటించే రైతన్న.. ఆ వేళ్లతోనే  మట్టిని పిసికి.. మనందరికీ అన్నం పెడతాడు.. అలాంటి రైతన్న చేతులకు బేడీలు వేసిన ప్రభుత్వాన్ని ఏమనాలి...?

రైతు సంక్షేమమే మా ప్రభుత్వ ధ్యేయమంటూ కల్లబొల్లి కబుర్లు చెప్పుకుంటూ.. దశ దిశలా దశాబ్ది ఉత్సవాలు నిర్వహిస్తున్న వేళ మరోమారు తెలంగాణ రైతుల చేతులకు బేడీలు పడ్డాయి. తమ భూములు ఇవ్వమని అడిగినందుకు అక్రమ కేసులు పెట్టడమే గాకుండా.. బేడీలు వేసి మరీ కోర్టుకు లాక్కెళ్లారు పోలీసులు.. రీజినల్ రింగ్ రోడ్డులో భూములు కోల్పోతున్నరైతులు ఆందోళనకు దిగడంతో కేసులు నమోదు చేసిన రైతులకు సంకెళ్లు వేసి కోర్టులో హాజరుపర్చడంపై సర్వత్రా ఆగ్రహావేశాలు వ్యక్తమవుతున్నాయి. తమ భూముల కోసం పోరాటం చేసిన రైతులకు బేడీలు వస్తారా? అన్న ప్రశ్నలు వినిపిస్తున్నాయి.మే 30న భువనగిరి కలెక్టరేట్ ఎదుట రైతులు ఆందోళన చేశారు. వారిపై నాన్ బెయిలబుల్ కేసులు నమోదు చేసిన భువనగిరి రూరల్ పోలీసులు.. అదే రోజు రిమాండ్కు తరలించారు. అందులో భాగంగా రైతులకు బేడీలు వేసి భవనగిరి కోర్టులో హాజరుపరిచారు. మంగళవారం వారికి సంకెళ్లు వేసి భువనగిరి కోర్టులో హాజరుపరిచారు. దీనిపై తీవ్ర విమర్శలు వెళ్లువెత్తుతున్నాయి.