ధరణి లీలలు చూడతరమా..?

• రెవెన్యూ రికార్డులలో లేని భూమి, ప్రస్తుతం రిజిస్ట్రేషన్ చేసుకోగానే బడా బకాసురుల పేరిట పట్టాగా నమోదు

• సర్వే నెంబర్ లేని ప్రభుత్వ బిలా దాఖలా భూమికి సర్వేనెంబర్ 555గా నమోదు

• రెవెన్యూ రికార్డులలో లేని భూమి, ప్రస్తుతం రిజిస్ట్రేషన్ చేసుకోగానే బడా బకాసురుల పేరిట పట్టాగా నమోదు

• కొండకల్లో బిలా దాఖలా భూ(అక్రమ దందా

• రెవిన్యూ పరిధిలో సుమారు 117 ఎకరాలకు పైగా బిలా దాఖలా ప్రభుత్వ భూమి

• వందల కోట్ల ప్రభుత్వ భూమి బకాసురుల పాలు

హైదరాబాద్ 04 ఆగస్టు (ఆదాబ్ హైదరాబాద్): రంగారెడ్డి జిల్లాలో కొండకల్, మోకీల గ్రామాల రెవెన్యూ మధ్యలో రికార్డుల్లో నమోదు కాని 117 ఎకరాలకు పైగా భూమి ఉంది. ఈ భూమిలో అనేక యేండ్లుగా స్థానిక రైతులు భూమిని సాగు చేసుకుంటున్నారు. ఈ రైతులకు ఎలాంటి పాస్ బుక్, పహణీలు రెవెన్యూ రికార్డుల్లో నమోదు లేదు. 2004లో పరిగి కేంద్రంలో జరిగిన బహిరంగ సభలో అనాటి జిల్లా మంత్రి ఆధ్వర్యంలో ఉమ్మడి ఆంధ్రప్రదేశ్ ముఖ్యమంత్రి రాజశేఖర్ రెడ్డి చేతులపై కొండకల్ రైతులకు లావాణీ పట్టా భూమిగా పాస్ పుస్తకాలు అందజేశారు. సర్వే నెంబర్ లేని ప్రభుత్వ బిలా దాఖలా భూమికి సర్వేనెంబర్ 555 గా నమోదు చేసి, లావణి పట్టా భూమిగా రైతులకు పట్టా పాస్ పుస్తకాలను అందజేసిన విషయం విధితమే. కానీ రెవెన్యూ అధికారులు రైతులకు లావాణీ పట్టా భూమిగా పాస్ పుస్తకాలు అయితే ఇచ్చారు కానీ.. రెవెన్యూ రికార్డులలో మాత్రం రైతుల వివరాలను నమోదు చేయలేదు.. పహాణీలో గాని, అసైన్డ్ రిజిస్టర్ లో గానీ రైతులకు ఇచ్చినట్టు భూమి వివరాలను నమోదు చేయలేదు. అప్పటి నుంచి ఇప్పటి వరకు ఆ భూమి బిలాదాఖలా భూమిగానే రెవెన్యూ రికార్డులలో కొనసాగుతూ వచ్చింది. కాగా రెవెన్యూ రికార్డులలో బిలా దాఖల భూమిగా ఉండటం, సాగు చేసుకుంటున్న రైతుల వద్ద లావాణి పట్టా పాస్ పుస్తకాలు ఉండడంతో.. ఈ భూమిపై అక్రమార్కుల కన్ను పడింది. ప్రభుత్వం ఈ భూమిని ఎప్పటికైనా, ఎలాగైనా తీసుకుంటుందని కొందరు ప్రచారం చేయడం మొదలెట్టారు. ఆలస్యమైతే ఆశాభంగం, త్వరపడితే నాలుగు నూకలైనా మిగులుతాయని మధ్యవర్తులు రైతులను భయపెట్టడం జరిగిందని వినికిడి. రైతుల భయాన్ని ఆసరాగా చేసుకున్న బడా వ్యక్తులు రైతులను సంప్రదించారు.