మేం గేట్లు తెరిస్తే..బీఆర్ఎస్ ఖాళీ

• కేసీఆర్ను ఖమ్మం ప్రజలు ఏనాడూ నమ్మలేదు • ఇందిరమ్మ ఇండ్లు 4,50,000 మంజూరు • రూ.22,500 కోట్ల నిధులు కేటాయింపు

• భద్రాద్రి వేదికగా ఇందిరమ్మ ఇళ్లకు శ్రీకారం 

•  పథకాన్ని ప్రారంభించిన సీఎం రేవంత్ రెడ్డి

• డబుల్ ఇళ్ల పేరుతో పేదలకు కేసీఆర్ మోసం

• డబుల్ ఇళ్లున్న ఊరుచూపి ఓట్లు అడగబోం

• ఎన్ని ఇళ్లు కట్టించారో చూపాలని బీజేపీకి సవాల్

• వరదనీటి కరకట్ట నిర్మించేందుకు రూ. 500కోట్లు

హైదరాబాద్ 11 మార్చి (ఆదాబ్ హైదరాబాద్): భద్రాచలంలో శ్రీ సీతారామచంద్ర స్వామి ఆశీస్సులతో ఇందిరమ్మ ఇళ్ల పథకం ప్రారంభం ఎంతో సంతోషంగా ఉందని సీఎం రేవంత్ రెడ్డి అన్నారు. భగవంతుడి సన్నిధిలో ఈ కార్యక్రమం ప్రారంభించడం ఆనందంగా ఉందన్నారు. అన్నింటికి మించి కాంగ్రెసు ఆదరిస్తున్న ఖమ్మం జిల్లా నుంచి కార్యక్రమం చేపట్టడం మరింతి ద్విగుణీకృతంగా ఉందన్నారు. సోమవారం భద్రాద్రిలో ఇందిరమ్మ ఇళ్ల పథకాన్ని సీఎం రేవంత్ ప్రారంభించారు. అనంతరం అక్కడ ఏర్పాటు చేసిన సభలో ముఖ్యమంత్రి మాట్లాడుతూ.. తాము గేట్లు తెరిస్తే బీఆర్ఎస్ పార్టీలో కేసీఆర్ కుటుంబ సభ్యులు తప్ప ఎవరూ మిగలరని అన్నారు. బీజేపీ, బీఆర్ఎస్ రెండు పార్టీలు ఒక్కటేనని.. ఇవి కలిసి పార్లమెంట్ ఎన్నికల్లో కాంగ్రెస్ ను ఓడించాలని.. తమ ప్రభుత్వాన్ని కూల్చాలని చూస్తున్నాయని ఆరోపించారు. ఎవరెన్ని చేసినా వచ్చే లోక్ సభ ఎన్నికల్లో రాష్ట్రంలో కాంగ్రెస్ 14 ఎంపీ స్థానాల్లో విజయం సాధిస్తుందని ధీమా వ్యక్తం చేశారు. పేదల సొంతింటి కల నాడు ఇందిరమ్మ పాలనలో ఉంటే నేడు ప్రజాపాలనలో మళ్లీ ఇందిరమ్మ ఇళ్ల పథకం అని అన్నారు. ఇల్లాలి ముఖంలో సంతోషం ఉండేలా పేద వాళ్ళు ఆత్మ గౌరవంతో బతికేలా ఇందిరమ్మ ఇళ్ల పథకాన్ని అందుబాటులోకి తీసుకొచ్చామన్నారు. ఇంటి పట్టా ఆడబిడ్డ పేరు మీద ఇస్తామన్నారు. డబ్బా ఇళ్ళు వద్దు పండగ పూట బిడ్డ అల్లుడు వస్తే ఎక్కడ ఉంటారు అంటూ పేదల కలల మీద కేసీఆర్ రాజకీయ వ్యాపారం చేశారని మండిపడ్డారు. కేసీఆర్ మోసానికి కాలం చెల్లిందని తెలంగాణ ప్రజలు కేసీఆర్ను బొంద పెట్టారన్నారు.