2ம் கட்ட மெட்ரோ ரயில் திட்டத்தில் பெரிய அளவில் பார்க்கிங் வசதி ஏற்படுத்த 10 ஏக்கர் நிலம் தேர்வு

பூந்தமல்லி, செப். 17: சென்னையில் நடைபெற்று வரும் 2ம் கட்ட மெட்ரோ ரயில் திட்டத்தில், தற்போது கோயம்பேடு, பூந்தமல்லி, சோழிங்கநல்லூர், சிறுசேரி, பட்ரோடு உள்ளிட்ட இடங்களில் கூடுதல் பார்க்கிங் வசதிக்காக 10 ஏக்கருக்கும் அதிகமான நிலம் தேர்வு செய்யப்பட உள்ளது.

சென்னையில், தற்போது 2 வழித்தடங்களில் 54 கிலோமீட்டர் தொலைவிற்கு இயங்கி வரும் மெட்ரோ ரயிலில் நாள்தோறும் லட்சக்கணக்கான மக்கள் பயணம் செய்து வருகின்றனர். இந்த நிலையில், முக்கிய ரயில் நிலையங்களில் காலை மற்றும் மாலை வேளைகளில் பயணிகளின் எண்ணிக்கை இருமடங்காக அதிகரித்து காணப்படுகிறது.

குறிப்பாக பீக் ஹவரில் கல்லூரி மாணவர்கள், அலுவலகங்களுக்கு செல்லுவோர் என பல தரப்பினரும் மெட்ரோ ரயிலில் பயணம் செய்கின்றனர்.

சென்னை மெட்ரோ ரயில் நிறுவனம் வழங்கி வரும் ஏராளமான வசதிகளாலும், பாதுகாப்பு காரணங்களாலும், மெட்ரோ ரயில்களுக்கு நாளுக்கு நாள் பயணிகளின் எண்ணிக்கை அதிகரித்து வருவதால், தற்போது 2ம் கட்ட மெட்ரோ ரயில் திட்ட பணிகள் செயல்படுத்தப்பட்டு வருகிறது.