பருவ மழைக்கு முன்பு முடியுமா இசிஆர் விரிவாக்க பணி?

விரைந்து முடிக்க மக்கள் கோரிக்கை

சென்னை மாநகரில் அண்ணா சாலை, பூந்தமல்லி நெடுஞ்சாலை, மெரினா காமராஜர் சாலையை தொடர்ந்து, முக்கிய சாலைகளாக ஓஎம்ஆர் மற்றும் இசி.ஆர் சாலைகள் உள்ளன. இந்த சாலையில் தினமும் பல ஆயிரக்கணக்கான வாகனங்கள் சென்று வருகின்றன. குறிப்பாக, சென்னையில் இருந்து 60 கி.மீ. தூரத்தில் உள்ள மாமல்லபுரம் வழியாக புதுச்சேரி, சிதம்பரம், சீர்காழி, நாகப்பட்டினம், திருத்துறைப்பூண்டி, ராமநாதபுரம் மற்றும் தூத்துக்குடி வழியாக கன்னியாகுமரி உடன் இணைக்கும் முக்கிய சாலையாக (மா.நெ.49) இசி.ஆர் உள்ளது.

சென்னையில் இருந்து இசிஆர் சாலைக்கு செல்ல வேண்டுமானால் திருவான்மியூர் தான் இசிஆர் சாலையின் நுழைவுப் பகுதியாக உள்ளது. இங்கு சாலை மிக குறுகியதாக உள்ளதால் திருவான்மியூர் முதல் அக்கரை வரை உள்ள சாலையை கடப்பது வாகன ஓட்டிகளுக்கு ஒரு சவாலாக உள்ளது.

எனவே, இந்த பிரச்சனைக்கு தீர்வு காணும் வகையில், தற்போது இசிஆர் சாலையை 6 வழிச்சாலையாக மாற்றும் பணிகள் நடந்து வருகிறது. இந்த சாலை, திருவான்மியூர் முதல் அக்கரை வரை 10.5 கி.மீ. தூரம் கொண்டது. இடத்தை பொறுத்து, 60 முதல் 80 அடி வரை அகலத்தில், நான்கு வழிச்சாலையாக உள்ளது. மேலும் 17 போக்குவரத்து சிக்னல்கள் உள்ளன. எனவே, சாலையை கடக்க வழக்கமாக சுமார் 45 நிமிடங்கள் முதல் 60 நிமிடங்கள் வரை ஆகிறது. நாளொன்றுக்கு 69,000 வாகனங்கள் செல்கின்றன. ஆனால் விடுமுறை நாட்களில் இந்த எண்ணிக்கை பல மடங்கு உயரும்.

கடந்த 2006ம் ஆண்டு திமுக ஆட்சியில் முதல்வராக இருந்த கலைஞர் சாலை விரிவாக்க அறிவிப்பை வெளியிட்டார். ஆனால் நிலம் கையகப்படுத்துவதில் ஏற்பட்ட சிக்கல்களால் பணிகள் கிடப்பில் போடப்பட்டது. பின்னர் 2012ம் ஆண்டு பல்வேறு கோரிக்கைகளுக்கு பிறகு பணி தொடங்கப்பட்டது. இதையடுத்து, முதல்கட்ட நிலம் எடுப்பு பணிக்காக ரூ.940 கோடி ஒதுக்கப்பட்டது. இதற்கான பணிகள் பல இடங்களில் விறுவிறுப்பாக நடந்து வருகிறது.

இசிஆர் விரிவாக்க பணிகள் வேகமெடுத்துள்ள நிலையில், சாலைகளின் கீழ் இருபுறமும் மீண்டும் தோண்டாதவாறு குடிநீர் வாரியம், மின் வாரியம், மழைநீர் வடிகால் பணிகள் போன்ற பணிகள் இருந்தால் அவற்றை உடனடியாக செயல்படுத்தவும் உத்தரவிடப்பட்டுள்ளது.