ஓமலூர் முதல் தர்மபுரி வழியாக ஓசூர் வரை ₹100 கோடியில் இருவழி ரயில் பாதை திட்டம் நிறைவேறுவது எப்போது?

அறிவிப்போடு நிற்பதால் பயணிகள் ஏமாற்றம்

தர்மபுரி நகரின் அருகே தர்மபுரி ரயில் நிலையம் அமைந்துள்ளது. இந்த ரயில் நிலையம் 1906ம் ஆண்டு ஜனவரி 16ம் தேதி ஆங்கிலேயர் காலத்தில் அமைக்கப்பட்டது. மீட்டர் கேஜில் ஒருவழிப்பாதையாக ரயில்பாதை அமைக்கப்பட்டது. இந்த ரயில்நிலையம் வழியாக சேலம் -பெங்களூரு, பெங்களூரு – சேலம் மார்க்கமாக ரயில்கள் இயக்கப்பட்டு வருகின்றன. தினசரி பயணிகள் மற்றும் சரக்கு ரயில் 25க்கும் மேற்பட்டவை இயக்கப்பட்டு வருகின்றன. தினசரி 2 ஆயிரம் பயணிகள் ஏறி, இறங்குகின்றனர். ஒருவழி ரயில்பாதை என்பதால், அதிக ரயில்களை இயக்க முடியாத நிலை உள்ளது. மேலும், தர்மபுரியில் இருந்து சென்னைக்கு நேரடியாக ரயில் சேவை வசதி இல்லை. இதனால் தர்மபுரியின் வளர்ச்சி பாதிக்கப்பட்டுள்ளது.