தமிழ்நாட்டின் 2ம் நகரங்களான கோவை-மதுரை மெட்ரோ திட்டங்களுக்கு நிதி ஒதுக்க வேண்டும்

மறைந்த முன்னாள் முதல்வர் கலைஞர் தலைமையிலான அரசால் கடந்த 2007ம் ஆண்டு ஒப்புதல் அளிக்கப்பட்டு, அப்போதைய துணை முதல்வராக இருந்த மு.க.ஸ்டாலினால் கடந்த 2009ம் ஆண்டு ஜூன் மாதம் பணிகள் தொடங்கப்பட்ட 54.1 கி.மீ நீளத்திலான சென்னை மெட்ரோ ரயில் திட்டம் கட்டம்-Iன் இரண்டு வழித்தடங்களில் முழுமையாக பயணிகள் சேவை இயக்கப்பட்டு வருகின்றன.

இந்த திட்டத்தின் கீழ் நாளொன்றிற்கு சராசரியாக 3.1 லட்சத்திற்கும் மேல் மக்கள் பயணம் செய்து வருகின்றார்கள். அதன்படி, ரூ.63,246 கோடி மதிப்பீட்டிலான சென்னை மெட்ரோ ரயில் திட்டம் கட்டம் -II க்கு ஒன்றிய அரசு பங்களிப்பினை அளிப்பதற்கான ஒப்புதலை தற்போது வழங்கியுள்ளது.

சென்னை மாநகரின் பொதுப் போக்குவரத்து கட்டமைப்பில் முதுகெலும்பாக விளங்கும் மெட்ரோ ரயில் போக்குவரத்தின் இரண்டாம் கட்டமும் செயல்பாட்டிற்கு வரும் நிலையில், மொத்தம் 172 கி.மீ மெட்ரோ ரயில் கட்டமைப்பாக இருக்கும். சென்னை மெட்ரோ ரயில் திட்டம் கட்டம் -IIன் கீழ் மேற்கொள்ளப்பட்டு வரும் கட்டுமானப்பணிகள் குறித்து சென்னை, நந்தனத்தில் உள்ள மெட்ரோ ரயில் நிறுவனத்தின் தலைமையகத்தில் தமிழ்நாடு முதல்வர் மு.க.ஸ்டாலின், ஒன்றிய வீட்டுவசதி மற்றும் நகர்ப்புற விவகாரங்கள் துறை மற்றும் மின்சாரத்துறை அமைச்சர் மனோகர்லால் கட்டார் ஆகியோர் தலைமையில் 2ம் கட்ட மெட்ரோ பணிகள் குறித்தான ஆய்வுக்கூட்டம் நடந்தன.