வேலை வாங்கி தருவதாக இளைஞர்களிடம் பல லட்சம் நூதன மோசடி செய்யும் கும்பல்

சென்னை விமான நிலையம், சுங்கத்துறையில்

₹20 லட்சம் மோசடி செய்தவரை பிடித்து போலீசில் ஒப்படைத்தனர்

சென்னை விமான நிலையம், சுங்கத்துறையில் வேலை வாங்கி தருவதாக 15 இளைஞர்களிடம் ரூ.20 லட்சம் மோசடி செய்த நபரை, பணம் கொடுத்து ஏமாந்தவர்களே மடக்கி பிடித்து போலீசில் ஒப்படைத்தனர். வேலைவாய்ப்பு ஆசை காட்டி பணம் பறிக்கும் மோசடி கும்பலிடம் ஏமாற வேண்டாம். இடைத்தரகர்கள் யாரும் கிடையாது என்று சென்னை விமான நிலையம் தெரிவித்துள்ளது. சென்னை விமான நிலையத்தில் கைநிறைய சம்பளத்துடன் கவுரவமான வேலை என்று பொய்யான தகவல்களை, படித்த இளைஞர்கள் மத்தியில் பரப்பி, ஒரு கும்பல் அப்பாவி இளைஞர்களை ஏமாற்றி தொடர்ந்து பணம் மோசடி செய்து வருகிறது.

இந்த கும்பல் சமூக வலைதளங்களான வாட்ஸ்அப் குழுக்கள் போன்றவைகளில் இந்திய விமான நிலைய ஆணையத்தின் முத்திரையை போலியாக பதிவிறக்கம் செய்து, அதன் மூலம் அறிவிப்புகளை வெளியிடுகிறது. சென்னை புறநகர் பகுதியான குரோம்பேட்டை, பல்லாவரம், பம்மல், மீனம்பாக்கம், ஆலந்தூர் உள்ளிட்ட பகுதிகளில் இதற்கான நேர்முக தேர்வுகள் நடப்பதாகவும், அந்த அறிவிப்புகளில் வெளியிடப்படுகிறது.