திருநெல்வேலி, தூத்துக்குடி, தென்காசி மாவட்டத்தில் கனமழை நிவாரண பணிகளை மேற்கொள்ள அமைச்சர்கள் விரைவு

முதல்வர் மு.க.ஸ்டாலின் சென்னை எழிலகத்தில் உள்ள மாநில அவசரகால செயல்பாட்டு மையத்திற்கு நேற்று நேரில் சென்று ஆய்வு செய்தார்.

அப்போது, திருநெல்வேலி, தூத்துக்குடி மற்றும் தென்காசி மாவட்டங்களில் பெய்து வரும் கனமழை குறித்து காணொலி காட்சி மூலம் மாவட்ட கலெக்டர்களிடம் கேட்டறிந்ததுடன், நிவாரண பணிகளை மேற்கொள்ள அமைச்சர்களை அப்பகுதிகளுக்கு அனுப்ப உத்தரவிட்டார். கடந்த 7ம் தேதி அன்று வங்கக்கடலில் உருவான காற்றழுத்த தாழ்வுப்பகுதி 10ம் தேதி ஆழ்ந்த காற்றழுத்த தாழ்வு பகுதியாக வலுப்பெற்றது.

அது பின்னர் இலங்கை மற்றும் தமிழ்நாடு கடலோர பகுதிகளை நோக்கி வரத் தொடங்கி தற்போது மன்னர் வளைகுடா பகுதியில் நிலவி வருகிறது. இதனால் தமிழ்நாட்டில் பல மாவட்டங்களில் கனமழை பெய்து வருகிறது. இந்த நிலையில், வருவாய் மற்றும் பேரிடர் மேலாண்மை துறை அமைச்சர் கே.கே.எஸ்.எஸ்.ஆர்.ராமச்சந்திரன் நேற்று முன்தினம் இரவு 8.30 மணி அளவில் மாநில அவசரகால செயல்பாட்டு மையத்தில் இருந்து திருநெல்வேலி, தூத்துக்குடி, தென்காசி மாவட்ட ஆட்சியர்களுடன் காணொலி வாயிலாக கலந்துரையாடி நிலைமையை கேட்டறிந்து, மீட்பு மற்றும் நிவாரண நடவடிக்கைகளை மேற்கொள்ளுமாறு அறிவுரை வழங்கினார்.