கவுன்சிலர் கொலைக்கு பழிதீர்த்த கும்பல் நெல்லை நீதிமன்ற வாசலில் வாலிபர் வெட்டிக் கொலை

நெல்லை மாவட்ட நீதிமன்ற நுழைவாயிலில் ஒரு கும்பல் பழிக்குப்பழியாக வாலிபரை கொடூரமாக வெட்டிக் கொலை செய்துவிட்டு காரில் தப்பியது.

இது தொடர்பாக 7 பேர் கைது செய்யப்பட்டனர். நெல்லை, கீழநத்தம் மேலூர் பகுதியைச் சேர்ந்தவர் மாயாண்டி (25). இவர் மீது கொலை உள்ளிட்ட பல்வேக்குகள் உள்ளன. பாளை. தாலுகா போலீசார் பதிவு செய்த வழக்கில் ஆஜராக நெல்லை நீதிமன்றத்திற்கு அவர் நேற்று சென்றார். அவருடன் தம்பி மாரிசெல்வம் உட்பட கூட்டாளிகளும் வெவ்வேறு வழக்குகளில் ஆஜராக சென்றனர்.

காலை 10மணி அளவில் மாயாண்டியும், அவரது கூட்டாளி ஒருவரும் நீதிமன்றத்திற்கு எதிரே உள்ள உணவகத்தில் டீ குடித்துவிட்டு திரும்பி கொண்டிருந்தனர். அங்கு நிறுத்தப்பட்டிருந்த கேரள பதிவெண் கொண்ட காரில் இருந்து இறங்கிய 4 பேர் மாயாண்டியை ஓட ஓட விரட்டிச் சென்று நீதிமன்ற நுழைவாயில் அருகே 10 அடி தூரத்தில் காலை இடறி விட்டனர். கீழே விழுந்தவரை சுற்றி வளைத்து தலை மற்றும் கால்களில் சரமாரியாக வெட்டிக் கொலை செய்தனர். வக்கீல்கள் உட்பட பொதுமக்கள் இதை நேரில் பார்த்து அலறியடித்து ஓடினர்.