இருதரப்பு உறவை வலுப்படுத்தியதற்காக பிரதமர் மோடிக்கு குவைத்தின் மிக உயரிய விருது

இரு தரப்பு நல்லுறவை வலுப்படுத்தியதற்காக, குவைத் நாட்டின் மிக உயரிய விருதை அந்நாட்டின் மன்னர் அமீர் ஷேக் மெஷல் அல்-அஹ்மத் அல்-ஜாபர் அல் சபாஹ், பிரதமர் மோடிக்கு வழங்கி கவுரவித்தார்.

இரு தலைவர்கள் இடையேயான இருதரப்பு பேச்சுவார்த்தையில் முக்கிய முடிவுகள் எடுக்கப்பட்டுள்ளன. பிரதமர் மோடி 2 நாள் பயணமாக குவைத் நாட்டிற்கு நேற்று முன்தினம் சென்றார். 43 ஆண்டுக்குப் பிறகு குவைத் செல்லும் இந்திய பிரதமர் என்பதால் மோடியின் இப்பயணம் மிகவும் முக்கியத்துவம் பெற்றது. அங்கு நேற்று முன்தினம் இந்திய வம்சாவளிகளை பிரதமர் மோடி சந்தித்து பேசினார்.

அதைத் தொடர்ந்து, நேற்று அவர் மன்னர் அமீர் ஷேக் அல்-அஹ்மத் அல்-ஜாபர் அல் சபாஹ்வை சந்திக்க பயான் அரண்மனைக்கு வந்தார். அங்கு பிரதமர் மோடிக்கு ராணுவ மரியாதையுடன் வரவேற்பு அளிக்கப்பட்டது. குவைத் பிரதமர் அகமது அப்துல்லா அல்ஜபெர் அல்-சாலஹ் நேரில் வந்து வரவேற்றார். பிரதமர் அகமது அப்துல்லாவையும், குவைத் பட்டத்து இளவரசர் ஷேக் சபா அல் காலித் அல் சபாஹ்வையும் பிரதமர் மோடி தனித்தனியாக சந்தித்து பேச்சுவார்த்தை நடத்தினார்.