இலங்கைக்கு எதிராக தீர்மானம்

ஐ.நா.வில் இந்தியா வாக்களிக்கவில்லை

இலங்கையில் அனைத்து மக்களின் நல்லிணக்கத்துக்கும் மனித உரிமைகளுக்கும் அரசைப் பொறுப்பேற்கச் செய்ய வலியுறுத்தி ஐ.நா. மனித உரிமைகள் கவுன்சிலில் (யுஎன்ஹெச்ஆர்சி) வியாழக்கிழமை வரைவுத் தீர்மானம் நிறைவேற்றப்பட் டது.

இந்த தீர்மானத்தின் மீதான வாக்கெடுப்பை இந்தியா புறக்கணித்தது.

இலங்கையில் விடுதலைப்புலிகளுக்கு எதிராக 2009-ஆம் ஆண்டு நடந்த இறுதிக்கட்ட போரின் போது, அப்பாவித் தமிழர்கள் கொல்லப்பட்டதாக குற்றச்சாட்டு உள்ளது. அங்கு தமிழர்களுக்கு எதிராக தொடர்ந்து மனித உரிமை மீறல்கள் நடந்து வருவதாகவும் குற்றச்சாட்டுகள் முன்வைக்கப்படுகின்றன.

இந்த மனித உரிமை மீறல் குற்றச் சாட்டை முன்வைத்து ஐ.நா. மனித உரிமை கவுன்சிலில் தொடர்ந்து தீர்மானம் தாக்கல் செய்யப்பட்டு வருகிறது. அதுபோல, ஸ்விட்சர்லாந்தின் ஜெனீவா நகரில் வியாழக்கிழமை நடை பெற்ற 47 நாடுகளை உறுப்பினராக கொண்ட யுஎன்ஹெச்ஆர்சி-யின் 51ஆவது அமர்வில் இலங்கையில் நல்லிணக்கம் மற்றும் மனித உரிமைகளுக்கு அரசைப் பொறுப்பேற்கச் செய்யும் வரைவு தீர்மானம் கொண்டுவரப்பட்டு வாக்கெடுப்பு நடத்தப்பட்டது.