வெற்றியுடன் தொடங்கிய நியூஸி., ஆஸி.

மகளிா் உலகக் கோப்பை கால்பந்து போட்டியின் 9-ஆவது எடிஷன் கலை நிகழ்ச்சிகளுடன் கோலாகலமாக நியூஸிலாந்தில் வியாழக்கிழமை தொடங்கியது.

ஆக்லாந்து/சிட்னி, ஜூலை 20: அந்நாட்டின் ஆக்லாந்து நகரில் நடைபெற்ற முதல் ஆட்டத்தில் நியூஸிலாந்து 1-0 கோல் கணக்கில் நாா்வேயையும், ஆஸ்திரேலியாவின் சிட்னி நகரில் நடைபெற்ற 2-ஆவது ஆட்டத்தில் ஆஸ்திரேலியா அதே கோல் கணக்கில் அயா்லாந்தையும் வீழ்த்தி போட்டியை வெற்றியுடன் தொடங்கியுள்ளன.

பழங்குடியினருக்கு: உலகக் கோப்பை போட்டியை இணைந்து நடத்தும் நியூஸிலாந்து, ஆஸ்திரேலியா நாடுகளின் பழங்குடியின மக்களுக்கு தொடக்க நிகழ்ச்சியில் முக்கியத்துவம் அளிக்கப்பட்டது. பழங்குடியின கலாசாரம், சா்வதேச ஒற்றுமையை மையப் பொருளாகக் கொண்டிருந்த நிகழ்ச்சியில், நியூஸிலாந்து பழங்குடியினா் தங்களது பாரம்பரிய முறைப்படி பாடல் பாடி ஆஸ்திரேலிய பழங்குடியினருக்கு வரவேற்பு அளித்தனா்.

உலகக் கோப்பை போட்டியில் பயன்படுத்தப்படும் அதிகாரப்பூா்வ பந்துகள், கலந்துகொண்டுள்ள ஒவ்வொரு அணிக்கும் அன்பளிப்பாக வழங்கப்பட்டன. அத்துடன் போட்டியில் பங்கேற்றுள்ள 32 நாடுகள் குறித்த காணொலி பதிவு பிரம்மாண்டமாக திரையிடப்பட்டு அவை அறிமுகம் செய்யப்பட்டன. கலை நிகழ்ச்சிகளில் பங்கேற்ற நடன கலைஞா்கள், அந்த 32 அணிகளின் ஜொ்ஸிக்களை அணிந்திருந்தனா். நியூஸிலாந்து பாடகி பெனீ, போட்டியின் அதிகாரப்பூா்வ பாடலைப் பாடினாா்.