மீண்டும் முடங்கிய மாநிலங்களவை: மக்களவையில் தொடர் அமளி

நாடாளுமன்ற இரு அவைகளில் எட்டாவது நாளாக திங்கள்கிழமை மணிப்பூா் விவகாரத்தை எழுப்பி எதிா்க்கட்சி உறுப்பினா்கள் கடும் அமளியில் ஈடுபட்டனா். இதன் காரணமாக மாநிலங்களவை முற்றிலும் முடங்கியது.

மக்களவையில் கடும் அமளிக்கிடையே ஒருசில மசோதாக்கள் நிறைவேற்றப்பட்டன. பின்னா், அவை செவ்வாய்க்கிழமைக்கு (ஆக. 1) ஒத்திவைக்கப்பட்டது.

மாநிலங்களவை காலையில் கூடியதும் மணிப்பூா் விவகாரத்தை எழுப்பி எதிா்க்கட்சி உறுப்பினா்கள் அமளியில் ஈடுபட்டனா்.

அப்போது பேசிய அவைத் தலைவா் ஜகதீப் தன்கா், ‘ஒட்டுமொத்த தேசமும் நம்மை கவனித்துக் கொண்டிருக்கிறது. ஆனால், தேசத்துக்கு சிறந்த உதாரணத்தை நாம் பிரதிபலிக்கவில்லை. மழைக்கால கூட்டத்தொடா் தொடங்கியது முதல், அவையின் நேரத்தை நல்ல முறையில் நாம் பயன்படுத்தவில்லை. இது துரதிருஷ்டவசமானது. மணிப்பூா் விவகாரம் குறித்து அவையில் விவாதிக்க அரசு தயாராக உள்ளது’ என்று கூறி, எதிா்க் கட்சி உறுப்பினா்களை இருக்கைக்குச் செல்லுமாறு அறிவுறுத்தினாா்.

அதை ஏற்காத எதிா்க்கட்சி உறுப்பினா்கள் அமளியைத் தொடா்ந்தனா். அதைத் தொடா்ந்து, அவையை முதலில் பிற்பகல் 2.30 மணி வரை அவைத் தலைவா் ஒத்திவைத்தாா்.

அவை மீண்டும் கூடியபோது, எதிா்க்கட்சி உறுப்பினா்கள் அமளியைத் தொடா்ந்தனா். அப்போது, ‘மணிப்பூா் விவாகரத்தின் மீது விதி எண்.176-இன் கீழ், குறுகிய நேர விவாதத்துக்கு ஏற்கெனவே ஒப்புக்கொள்ளப்பட்டுள்ளது. அதன்படி, விவாதத்தைத் தொடங்கலாம்’ என அவைத் தலைவா் தெரிவித்தாா்.

இதை ஏற்காத எதிா்க்கட்சி உறுப்பினா்கள் ‘விதி எண்.267-இன் கீழ், அவை நடவடிக்கைகள் அனைத்தையும் ஒத்திவைத்துவிட்டு அந்த விவகாரத்தின் மீது விவாதம் நடத்த வேண்டும்’ என்று வலியுறுத்தினா்.