மத்திய பிரதேசம், சத்தீஸ்கரில் புதிய முதல்வர்கள் பதவியேற்பு-பிரதமர் மோடி பங்கேற்பு

மத்திய பிரதேச முதல்வராக மோகன் யாதவும், சத்தீஸ்கர் முதல்வராக விஷ்ணு தேவ் சாயும் புதன்கிழமை (டிச.13) பதவியேற்றனர்.

இரு மாநிலங்களில் நடைபெற்ற பதவியேற்பு விழாக்களிலும் பிரதமர் நரேந்திர மோடி, மத்திய உள்துறை அமைச்சர் அமித் ஷா, பாஜக தேசியத் தலைவர் ஜெ.பி.நட்டா, மத்திய அமைச்சர்கள் உள்ளிட்டோர் பங்கேற்றார்.

மத்திய பிரதேசம் (230 தொகுதிகள்) மற்றும் சத்தீஸ்கரில் (90 தொகுதிகள்) கடந்த மாதம் பேர வைத் தேர்தல்கள் நடைபெற்று, கடந்த 3-ஆம் தேதி முடிவுகள் வெளியிடப்பட்டன.

மத்திய பிரதேசத்தில் 163 இடங்களில் வெற்றி பெற்று ஆட்சியைத் தக்கவைத்த பாஜக, சத்தீஸ்கரில் 54 இடங்களுடன் காங்கிரஸிடம் இருந்து ஆட்சியைக் கைப்பற்றியது.

முதல்வர் வேட்பாளரை அறிவிக்காமலேயே இத்தேர்தல்களை பாஜக எதிர்கொண்டதால், புதிய முதல்வர்கள் குறித்த எதிர்பார்ப்பு நீடித்து வந்தது.

இந்தச் சூழலில், இரு மாநிலங்களிலும் ஏற்கெனவே முதல்வராகப் பதவி வகித்தவர்களுக்குப் பதிலாக புதிய தலைவர்கள் அப்பதவிக்கு தேர்வு செய்யப்பட்டனர். அதன் படி, மத்திய பிரதேச முதல்வராக இதர பிற்படுத்தப்பட்ட பிரிவை (ஓபிசி) சேர்ந்த மோகன் யாதவும் (58), சத்தீஸ்கர் முதல்வராக பழங்குடியின சமூகத்தைச் சேர்ந்த முன்னாள் மத்திய அமைச்சர் விஷ்ணு தேவ் சாயும் (59) தேர்வாகினர்.