கைதிகள் பரிமாற்றப் பேச்சு: ஹமாஸ் நிராகரிப்பு

இஸ்ரேலில் இருந்து கடத்திச் செல்லப்பட்ட பிணைக் கைதிகளை பரிமாற்றம் செய்துகொள்வது தொடா்பான பேச்சுவாா்த்தைகளை ஹமாஸ் அமைப்பு திடீரென நிராகரித்தது.

இது குறித்து அந்த அமைப்பின் மூத்த அதிகாரி பாசிம் நயீம் செவ்வாய்க்கிழமை கூறியதாவது:

இஸ்ரேல் சிறைகளில் உள்ள பாலஸ்தீன கைதிகளுக்குப் பதிலாக, அந்த நாட்டின் பிணைக் கைதிகளை பரிமாற்றம் செய்துகொள்வது தொடா்பான எந்தவித பேச்சுவாா்த்தையையும் ஹமாஸ் அமைப்பு திட்டவட்டமாக நிராகரிக்கிறது.

காஸாவில் தாக்குதல் நடத்தி பாலஸ்தீனா்களை இஸ்ரேல் ராணுவம் கொன்று குவித்து வரும் வரை இத்தகைய பேச்சுவாா்த்தைகளில் பங்கேற்பதில்லை என்பதே ஹமாஸின் உறுதியான நிலைப்பாடு ஆகும்.

அதே நேரம், காஸாவில் போா் நிறுத்தம் மேற்கொள்ளப்படுவதற்கும், அந்தப் பகுதி மக்களுக்கு நிவாரணப் பொருள்கள் வருவதற்காக எல்லைகள் திறக்கப்படுவதற்கும் வகை செய்யும் எந்தவித முன்முயற்சியிலும் பங்கேற்கத் தயாராக இருக்கிறோம் என்றாா் அவா்.