சில மாநிலங்களுக்கு மட்டும் நிதி வழங்கவில்லை என்று கூறுவது அரசியல்

மக்களவையில் அமைச்சர் நிர்மலா சீதாராமன்

சில மாநிலங்களுக்கு மட்டும் மத்திய அரசு உரிய நிதியை வழங்கவில்லை என்று கூறுவது அரசியல் உள்நோக்கத்துடன் அரசு மீது களங்கம் ஏற்படுத்துவதற்கான பொய்யான குற்றச்சாட்டு என்று மத்திய நிதியமைச்சா் நிா்மலா சீதாராமன் மக்களவையில் தெரிவித்தாா்.

காங்கிரஸ் எம்.பி. அதீா் ரஞ்சன் சௌதரி மக்களவையில் கேள்வி நேரத்தில் திங்கள்கிழமை பேசும்போது மத்திய அரசு மீது பல்வேறு குற்றச்சாட்டுகளை முன்வைத்தாா். குறிப்பாக, காங்கிரஸ் ஆட்சியில் உள்ள கா்நாடகத்துக்கு மத்திய அரசு வழங்க வேண்டிய நிலுவைத் தொகையை வழங்கவில்லை என்று குற்றம்சாட்டினாா்.

இதற்கு பதிலளித்து அமைச்சா் நிா்மலா சீதாராமன் கூறியதாவது: மத்திய அரசின் நிா்வாகச் செயல்பாடுகள் முறையாக உள்ளன. எனவே, எந்த மாநிலத்துக்கும் அளிக்க வேண்டிய தொகை நிலுவையாக உள்ளது என்ற பேச்சு எழுவதற்கு அவசியமே இல்லை. நிதி ஒதுக்கீடு விஷயத்தில் நிதிக் குழுவின் பரிந்துரைப்படி மத்திய அரசு செயல்பட்டு வருகிறது.