காங்கிரஸ்-ஆம் ஆத்மி தொகுதி உடன்பாடு

மக்களவைத் தேர்தலையொட்டி, தில்லி, குஜராத், ஹரியாணா, கோவாவில் காங்கிரஸ்-ஆம் ஆத்மி இடையே தொகுதி உடன்பாடு எட்டப்பட்டு, இரு கட்சிகள் தரப்பில் சனிக்கிழமை கூட்டாக அறிவிக்கப்பட்டது.

புது தில்லி, பிப். 24: எதிர்க்கட்சிகளின் ‘இந்தியா’ கூட்டணியில் காங்கிரஸ்-சமாஜவாதி இடையே அண்மையில் தொகுதிப் பங்கீடு உறுதியான நிலையில், மேற்கண்ட மாநிலங்களில் காங்கிரஸ் - ஆம் ஆத்மி தொகுதிப் பங்கீடு உறுதி செய்யப்பட்டுள்ளது.

தேசியத் தலைநகர் தில்லியில் மொத்தமுள்ள 7 மக்களவைத் தொகுதிகளில் ஆளும் ஆம் ஆத்மி 4 இடங்களிலும், காங்கிரஸ் 3 இடங்களிலும் போட்டியிடவுள்ளன.

26 தொகுதிகளைக் கொண்ட குஜராத்தில் 2 இடங்கள் (பரூச், பாவ்நகர்) ஆம் ஆத்மிக்கு ஒதுக்கப்பட்டுள்ளன. மீதமுள்ள 24 இடங்களில் காங்கிரஸ் போட்டியிடுகிறது. ஹரியாணாவில் மொத்தமுள்ள 10 தொகுதிகளில் காங்கிரஸ் 9 இடங்களிலும் ஆம் ஆத்மி ஓரிடத்திலும் (குருக்ஷேத்ரம்) களமிறங்க உள்ளன.

இரண்டு தொகுதிகளைக் கொண்ட கோவாவில் ஆம் ஆத்மி ஆதரவுடன் இரண்டிலும் காங்கிரஸ் போட்டியிடவுள்ளது. சண்டீகர் தொகுதியிலும் காங்கிரஸ் களம் காண்கிறது. அதேநேரம், ஆம் ஆத்மி ஆளும் பஞ்சாபில் இரு கட்சிகளும் தனித்தனியாக போட்டியிட பரஸ்பரம் முடிவு செய்துள்ளன.