தமிழகத்தில் ஊழல் அரசியலுக்கு முற்றுப்புள்ளி-பிரதமர் நரேந்திர மோடி

பல்லடம்: தமிழகத்தில் ஊழல் அரசியலுக்கு முற்றுப்புள்ளி வைக்க பாஜக தயாராகி வருவதாக பிரதமர் மோடி கூறினார்.

"அனைவரையும் உள்ளடக்கிய வளர்ச்சியை ஏற்படுத்த பாஜகவின் கொள்கைகளை தமிழ்நாட்டில் வீடுதோறும் தொண்டர்கள் பிரசாரம் செய்ய வேண்டும்' எனவும் அவர் கேட்டுக்கொண்டார்.

பாஜக மாநிலத் தலைவர் கே.அண்ணாமலை மேற்கொண்ட "என் மண், என் மக்கள்' நடைப்பயணத்தின் நிறைவு பொதுக்கூட்டம் திருப்பூர் மாவட்டம், பல்லடம் அருகேயுள்ள மாதப்பூரில் செவ்வாய்க்கிழமை நடைபெற்றது. மத்திய செய்தி ஒலிபரப்புத் துறை இணை அமைச்சர் எல்.முருகன் வரவேற்றார்.

இந்தக் கூட்டத்தில் பங்கேற்று பிரதமர் மோடி பேசியதாவது: நாட்டின் மிகப்பெரிய ஜவுளித் தொழில் மையமாக கொங்கு மண்டலம் விளங்குகிறது. இங்குள்ள குறு, சிறு, நடுத்தரத் தொழில் நிறுவனங்கள் நாட்டின் பொருளாதார வளர்ச்சியில் பெரும் பங்கு வகிக்கின்றன.

வளர்ச்சி அரசியலை வடிவமைப்பதிலும், நாட்டின் முன்னேற்றத்துக்கான அத்தியாயத்தை உருவாக்குவதிலும் தமிழ்நாடு முக்கிய இடம் வகிக்கிறது. 2024}ஆம் ஆண்டில் வளர்ச்சி அரசியலின் புதிய மையமாக மாறி தமிழ்நாடு வரலாறு படைக்க உள்ளது. ஒளிமயமான எதிர்காலத்தை நோக்கிய தமிழக மக்களின் அசைக்க முடியாத ஆதரவுக்கு உதாரணமாக "என் மண், என் மக்கள்' நடைப்பயணம் அமைந்துள்ளது.

தமிழ்நாட்டுடனான எனது தொடர்பு வெறும் அரசியல் ரீதியிலானது அல்ல, அது மனதுக்கு மிகவும் நெருக்கமானது. தமிழ்நாட்டில் பாஜக ஆட்சியில் இல்லாவிட்டாலும் மக்களின் இதயத்தில் இருக்கிறது.

தமிழ்நாட்டுக்கு மூன்று மடங்கு நிதி: தமிழ்நாட்டுக்கு கடந்த 2004 முதல் 2014 வரையிலான காங்கிரஸ் } திமுக ஆட்சிக் காலத்தில் வழங்கப்பட்டதைவிட மூன்று மடங்கு நிதியை பாஜக அரசு வழங்கியுள்ளது.