காஸாவில் வான்வழியாக உணவுப் பொட்டலங்களை வீசியது அமெரிக்கா

போரால் பாதிக்கப்பட்டுள்ள காஸாவில் அமெரிக்கா வான் வழியாக நிவாரணப் பொருள்களை சனிக்கிழமை விநியோகித்தது.

சுமார் 5 மாதங்களாக நடத்தப்படும் குண்டுவீச்சு மற்றும் முற்றுகை காரணமாக கடுமையான பஞ்ச அபாயத்தை எதிர்நோக்கியிருக்கும் அந்தப் பகுதியில், உணவுப் பொருள்களை வாங்குவதற்காகக் காத்திருந்தவர்கள் மீது இஸ்ரேல் ராணுவம் சரமாரியாக துப்பாக்கியால் சுட்டு நூற்றுக்கும் மேற்பட்டவர்கள் உயிரிழந்ததாகக் கூறப்படும் நிலையில் இந்த நடவடிக்கையை அமெரிக்கா மேற்கொண்டுள்ளது.

இது குறித்து அசோசியேட்டட் பிரஸ் செய்தி நிறுவனம் கூறுகையில், காஸா பகுதியில் அமெரிக்க போர் விமானங்கள் 38,000 உணவுப் பொட்டலங்களை வான்வழியாக சனிக்கிழமை விநியோகித்தன.

அந்தப் பகுதி மக்களுக்கு அத்தியாவசிய நிவாரணப் பொருள்களை வான்வழியாக வழங்க அதிபர் ஜோ பைடன் அனுமதியளித்துள்ளார். அதன் முதல்கட்டமாக இந்த உணவுப் பொட்டலங்கள் விநியோகிக்கப்பட்டுள்ளன என்று அந்த செய்தி நிறுவனம் தெரிவித்துள்ளது.

கடந்த அக். 7-இல் தங்கள் நாட்டுக்குள் நுழைந்து சுமார் 1,200 பேரை படுகொலை செய்த ஹமாஸ் அமைப்பினரை ஒழித்துக்கட்டுவதாகக் கூறி, காஸா பகுதியில் இஸ்ரேல் ராணுவம் சுமார் 5 மாதங்களாக தாக்குதல் நடத்தி வருகிறது.