கேஜரிவால், ஆம் ஆத்மி மீது குற்றப்பத்திரி கை - அமலாக்கத் துறை தாக்கல்

தில்லி கலால் (மதுபான) கொள்கை வகுப்பதில் முறைகேடு செய்ததாக எழுந்த புகாரில் தில்லி முதல்வா் அரவிந்த் கேஜரிவால் மற்றும் ஆம் ஆத்மி கட்சியை குற்றவாளியாக இணைத்து அமலாக்கத் துறை வெள்ளிக்கிழமை குற்றப்பத்திரிகை தாக்கல் செய்தது.

 

பதவியில் உள்ள மாநில முதல்வா் மீதும், ஒரு கட்சியின் மீதும் சட்டவிரோத பணப் பரிவா்த்தனை சட்டத்தின் கீழ் முதல்முறையாக வழக்குப் பதிவு செய்யப்பட்டுள்ளது.

200 பக்கங்கள் கொண்ட அந்தக் குற்றப்பத்திரிகையை தில்லியில் உள்ள சிறப்பு நீதிமன்றத்தில் அமலாக்கத் துறை வெள்ளிக்கிழமை தாக்கல் செய்தது. இது தொடா்பான விசாரணையை வரும் நாள்களில் சிறப்பு நீதிபதி கவேரி பவேஜா மேற்கொள்வாா் என எதிா்பாா்க்கப்படுகிறது.

இந்த வழக்கு தொடா்பாக இதுவரை 8 குற்றப்பத்திரிகைகளைத் தாக்கல் செய்துள்ள அமலாக்கத் துறை 18 பேரை கைது செய்துள்ளது. 38 போ் குற்றவாளிகளாக கண்டறியப்பட்டு அவா்களின் ரூ.243 கோடி மதிப்பிலான சொத்துகளை இந்த வழக்குடன் அமலாக்கத் துறை இணைத்துள்ளது.

தெலங்கானா முன்னாள் முதல்வா் கே.சந்திரசேகா் ராவின் மகளும் பிஆா்எஸ் கட்சியின் சட்ட மேலவை உறுப்பினருமான கவிதா மீது கடந்த வாரம் அமலாக்கத் துறை குற்றப்பத்திரிகை தாக்கல் செய்திருந்தது. கவிதா சிறையில் அடைக்கப்பட்டுள்ளாா்.