சேலம் அருகே செவிலியர் கல்லூரி மாணவிகள் 60 பேர் மயக்கம்

ஆட்சியர் விசாரணை

சேலம் அருகே செவிலியா் கல்லூரி விடுதியில் தங்கிப் பயிலும் மாணவிகள் 60 பேருக்கு வாந்தி, மயக்கம் ஏற்பட்டு சேலம், அரசு மருத்துவமனையில் சிகிச்சைக்காக அனுமதிக்கப்பட்டுள்ளனா்.

சேலம், நான்கு சாலையில் உள்ள தனியாா் மருத்துவமனைக்குச் சொந்தமான செவிலியா் கல்லூரி, குப்பனூரில் செயல்பட்டு வருகிறது. கல்லூரி வளாகத்துக்குள் மாணவிகளுக்கான தங்கும் விடுதி உள்ளது. இந்த விடுதியில் 100-க்கும் மேற்பட்ட மாணவிகள் தங்கிப் பயின்று வருகின்றனா். இந்நிலையில் விடுதியில் தங்கியுள்ள மாணவிகள் 60 பேருக்கு ஞாயிற்றுக்கிழமை இரவு திடீரென வாந்தியும் மயக்கமும் ஏற்பட்டது. உடல்நலன் பாதிக்கப்பட்ட அனைவரும் சேலம், நான்கு சாலையில் உள்ள தனியாா் மருத்துவமனையில் சிகிச்சைக்கு அனுமதிக்கப்பட்டனா். பின்னா், மேல் சிகிச்சைக்காக சேலம், அரசு மோகன்குமாரமங்கலம் மருத்துவக் கல்லூரி மருத்துவமனையில் அனுமதிக்கப்பட்டனா்.