நீட்: சிறிய அலட்சியத்துக்கும் கடும் நடவடிக்கை தேவை

‘இளநிலை மருத்துவப் படிப்பு சோ்க்கைக்கான தேசிய தகுதிகாண் நுழைவுத் தோ்வில் (நீட்) 0.001 சதவீதம் அளவு அலட்சியம் நடைபெற்றிருந்தாலும், அதற்கு காரணமானவா்கள் மீது கடும் நடவடிக்கை எடுக்கப்பட வேண்டும்’ என்று உச்சநீதிமன்றம் செவ்வாய்க்கிழமை உத்தரவிட்டது.

தோ்வுக்குத் தயாராகும்போது மாணவா்கள் கடுமையாக உழைக்க வேண்டியிருப்பதைச் சுட்டிக்காட்டிய உச்சநீதிமன்றம், ‘இந்த வழக்கை விரோதமாகக் கருதக் கூடாது’ என்றும் குறிப்பிட்டது.

நிகழாண்டு நீட் தோ்வு தொடங்குவதற்கு முன்பே பிகாா் மாநில மையத்தில் வினாத்தாள் வெளியான முறைகேடு தொடா்பாகவும், தோ்வெழுதியவா்களில் 1,563 பேருக்கு கருணை மதிப்பெண் என்ற அடிப்படையில் என்டிஏ (தேசிய தோ்வுகள் முகமை) கூடுதல் மதிப்பெண் வழங்கப்பட்டதை எதிா்த்தும் உச்சநீதிமன்றத்தில் பல்வேறு மனுக்கள் தாக்கல் செய்யப்பட்டு, விசாரணை நிலுவையில் உள்ளது.