பட்ஜெட் குறித்து முதல்வர் மு.க.ஸ்டாலின்

பட்ஜெட் மூலம் தமிழ்நாட்டில் தோ்தல் கணக்கை தீா்க்க மத்திய பாஜக அரசு நினைத்திருப்பது வேதனைக்குரியது என்று முதல்வா் மு.க.ஸ்டாலின் குற்றஞ்சாட்டியுள்ளாா்.

மேலும், பட்ஜெட்டில் தமிழ்நாட்டுக்கு மாபெரும் துரோகம் இழைக்கப்பட்டுள்ளதாகவும் அவா் கூறியுள்ளாா்.

அவா் செவ்வாய்க்கிழமை வெளியிட்ட அறிக்கை: மத்திய அரசின் பட்ஜெட் ஒட்டுமொத்த நாட்டுக்கான அறிக்கையாகத் தெரியவில்லை. மாறாக, அரசியல் காரணங்களுக்காக, பிகாா், ஆந்திர மாநிலங்களை ஆள்வோருடன் மேற்கொள்ளப்பட்ட ‘கூட்டணி ஒப்பந்தம்’ போன்றே உள்ளது. அரசியல் சுயலாபங்களுக்காக, குறிப்பிட்ட சில மாநிலங்களுக்கு மட்டும் நிதியை தாராளமாக அள்ளிக் கொடுத்துள்ளது. மதவாத அரசியலை தொடா்ந்து புறக்கணிக்கிறது என்ற ஒரே காரணத்துக்காக நாட்டின் வளா்ச்சியில் பெரும் பங்கு வகித்து வரும் தமிழ்நாடு போன்ற மாநிலங்கள் மீது மத்திய அரசு வன்மத்தைக் கக்கிடும் வகையில் மத்திய பட்ஜெட் அமைந்துள்ளது.