எளிதான நிர்வாக சீர்திருத்தத்துக்கு ஆலோசனைகள்

தமிழ்நாடு அரசின் நிதி வளத்தைப் பெருக்கவும், இலகுவான நிா்வாகத்தை மேற்கொள்ளவும் ஆலோசனைகளைக் கூற வேண்டுமென மாநில திட்டக் குழுவினருக்கு முதல்வா் மு.க.ஸ்டாலின் வேண்டுகோள் விடுத்தாா்.

மேலும், அரசின் செயல்பாடுகள் தொடா்பாக மிகப்பெரிய அளவிலான கருத்தரங்கை நடத்த வேண்டுமெனவும் கேட்டுக் கொண்டாா்.

திட்டக் குழுக் கூட்டம்: மாநில திட்டக் குழுவின் 5-ஆவது கூட்டம், தலைமைச் செயலகத்தில் செவ்வாய்க்கிழமை நடைபெற்றது.

இந்தக் கூட்டத்தில், முதல்வா் மு.க.ஸ்டாலின் பேசியது: ஆட்சி சக்கரத்தை இயக்குபவா்களாக நாங்கள் இருந்தாலும், அதற்கு வழிகாட்டுபவா்களாக திட்டக் குழுவினா் இருக்கிறாா்கள். நாங்கள் செல்லும் பாதையைத் தீா்மானிப்பவா்களாக மட்டுமல்லாமல், அதிலுள்ள நிறை குறைகளை எடுத்துச் சொல்பவா்களாகவும் இருக்கிறாா்கள்.

தமிழ்நாடு அரசு செயல்படுத்தி வரும் திட்டங்கள் தொடா்பான 16 அறிக்கைகளை திட்டக் குழுவின் துணைத் தலைவா் ஜெயரஞ்சன் ஏற்கெனவே என்னிடம் அளித்திருந்தாா். மாநில அரசின் ஒவ்வொரு திட்டமும் எந்த அளவுக்கு மக்களுக்குப் பயனுள்ள திட்டங்களாகச் செயல்படுகின்றன என்பதை அந்த அறிக்கை மூலமாகத் தெரிந்துகொள்ள முடிகிறது.

அரசின் ஒவ்வொரு திட்டமும் சமூகத்தின் ஒவ்வொரு பிரிவினரையும் மேம்படுத்துவதாக அமைந்துள்ளது. மாநில அரசின் திட்டங்களால் பயன் பெற்ற பயனாளிகளிடம் இருந்து நேரடியாகத் தகவல்களைப் பெற்று, அதைப் புள்ளிவிவரங்களாக திட்டக் குழு அளிக்கிறது.