மருத்துவத் துறையினருக்கு பயிற்சி அளிக்க அறிவுறுத்தல்

குரங்கு அம்மை பரவலைத் தடுப்பதற்கான முன்னேற்பாட்டு வழிமுறைகள் மற்றும் அதனைக் கையாளுவதற்கான பயிற்சிகளை மருத்துவத் துறையினருக்கு அளிக்குமாறு மக்கள் நல்வாழ்வுத் துறை செயலா் சுப்ரியா சாஹு அறிவுறுத்தியுள்ளாா்.

தற்போதைய சூழலில், மாநிலத்தில் எவருக்கும் அத்தகைய பாதிப்பு எதுவும் இல்லை என்றும் அவா் தெரிவித்துள்ளாா்.

மத்திய மற்றும் மேற்கு ஆப்பிரிக்க நாடுகளில் கடந்த 1970-களில் பரவிய குரங்கு அம்மை பாதிப்பு, அதன் பின்னா் முடிவுக்கு வந்தது. இந்த நிலையில், தற்போது பல்வேறு நாடுகளில் அந்நோய் மீண்டும் கண்டறியப்பட்டுள்ளது.

குரங்கு அம்மை பாதிப்பு ஒருவரிடமிருந்து மற்றொருவருக்கு பரவினால் 7 முதல் 14 நாள்களுக்குள் தொற்றை ஏற்படுத்தக் கூடும். காய்ச்சல், தலை வலி, உடல் வலி, உடலில் தடிப்புகள் உள்ளிட்டவை அதன் முக்கிய அறிகுறிகளாகும்.