சின்னர், சபலென்கா சாம்பியன்

சின்சினாட்டி ஓபன் மாஸ்டர்ஸ் டென்னிஸ் போட்டியில், ஆடவர் பிரிவில் இத்தாலியின் யானிக் சின்னர், மகளிர் பிரிவில் பெலாரஸின் அரினா சபலென்கா ஆகியோர் சாம்பியன் கோப்பை வென்றனர்.

ஆண்டின் கடைசி கிராண்ட்ஸ்லாம் போட்டியான யுஎஸ் ஓபனுக்கு முன்னோட்டமாக இருக்கும் இந்தப் போட்டியில், ஆடவர் ஒற்றையர் இறுதிச்சுற்றில், உலகின் நம்பர் 1 வீரரான சின்னர் 7-6 (7/4), 6-2 என்ற நேர் செட்களில், அமெரிக்காவின் ஃபிரான்சஸ் டியாஃபோவை வீழ்த்தினார். இருவருக்குமே இந்தப் போட்டியில் இதுவே முதல் இறுதிச்சுற்றாகும். இதற்கு முன் இருவரும் இந்தப் போட்டியில் அதிகபட்சமாக 3-ஆவது சுற்று வரை வந்துள்ளனர்.

டியாஃபோவை 5-ஆவது முறையாகச் சந்தித்த சின்னர், 4-ஆவது வெற்றியைப் பதிவு செய்துள்ளார். வெற்றிக்குப் பிறகு பேசிய சின்னர், "சர்வதேச டென்னிஸில் தற்போது நான் இருக்கும் இடத்துக்காக மகிழ்ச்சி அடைகிறேன்.

இந்த நிலையை அப்படியே தொடர முயற்சி செய்வேன். அடுத்ததாக, யுஎஸ் ஓபன் போட்டிக்கு தயாராவதே முக்கியமானது' என்றார்.

முன்னதாக, முதல் செட்டை டை பிரேக்கர் வரை கொண்டு சென்ற டியாஃபோ, அதில் தொடர்ந்து 3 தவறுகளைச் செய்து செட்டை இழந்தார். 2-ஆவது செட்டில் சின்னர் 5-1 என முன்னிலையில் இருக்க, டியாஃபோ 3 மேட்ச் பாய்ன்ட்களை பெற்று 5-2 என முன்னேறினார். எனினும், சின்னர் ஒரு சர்வ் மூலமாக செட்டை தனதாக்கி ஆட்டத்தை முடிவுக்குக் கொண்டு வந்தார்.

சின்னருக்கு இது 3-ஆவது மாஸ்டர்ஸ் பட்டமாகும். வெற்றியை இழந்தாலும், இறுதிச்சுற்று வரை வந்ததன் மூலமாக உலகத் தரவரிசையில் 20-ஆவது இடத்துக்கு வந்திருக்கிறார் டியாஃபோ. தற்போது, டாப் 20 இடத்தில் டெய்லர் ஃப்ரிட்ஸ் (12-ஆம் இடம்), பென் ஷெல்டன் (13), டாமி பால் (14), செபாஸ்டியன் கோர்டா (16), ஃபிரான்சஸ் டியாஃபோ (20) என 5 அமெரிக்கர்கள் உள்ளனர். 1997-க்குப் பிறகு ஏடிபி தரவரிசையில் டாப் 20 இடத்தில் 5 அமெரிக்கர்கள் இருப்பது இதுவே முதல் முறையாகும்.

பரிசுத் தொகை & ரேங்கிங் புள்ளிகள்