100 இடங்களில் உணவுத் தர பாதுகாப்பு, சோதனை ஆய்வகங்கள்; 50 இடங்களில் உணவு தானிய சேமிப்பு கிடங்கு

|மத்திய நிதியமைச்சர் நிர்மலா சீதாராமன் தகவல்

நாடு முழுவதும் 100 இடங்களில் உணவுத் தர பாதுகாப்பு, சோதனை ஆய்வகங்கள், எம்எஸ்எம்இ துறையினருடன் இணைந்து 50 இடங்களில் பல்வேறு உணவு தானியங்களை சேமிக்கும் கிடங்குகள் அமைக்கும் திட்டத்தைச் செயல்படுத்த உள்ளதாக மத்திய நிதியமைச்சர் நிர்மலா சீதாராமன் தெரிவித்தார்.

கோவை கொடிசியாவில் தொழில்முனைவோருடனான கலந்துரையாடல் கூட்டம் புதன்கிழமை நடைபெற்றது. இதில், கோவையைச் சேர்ந்த பல்வேறு தொழில் அமைப்புகளின் நிர்வாகிகள் பங்கேற்று தங்களின் கோரிக்கைகளை சம்பந்தப்பட்ட மத்திய அரசு அதிகாரிகளிடம் தெரிவித்தனர்.

இதைத் தொடர்ந்து தொழில்முனைவோரிடையே மத்திய பட்ஜெட் குறித்தும், தொழில்முனைவோரின் கோரிக்கைகள் குறித்தும் அமைச்சர் நிர்மலா சீதாராமன் பேசியதாவது:

மத்தியில் பாஜக அரசு பதவி ஏற்றதில் இருந்து தேவையற்ற 1,500 சட்டங்கள் நீக்கப்பட்டுள்ளன. தொழில்களை தடையின்றி இலகுவாக நடத்துவதற்கு ஏதுவாக சுமார் 40,000 தேவையற்ற நடைமுறைகளைக் கைவிட்டிருக்கிறோம். இதுபோன்ற மாறுதல்களை இன்னும் கொண்டு வருவோம். நாடு முழுவதும் பல்வேறு தொழில்கள் செறிவாக நடைபெறக்கூடிய இடங்கள் 163 இருந்தாலும், அவற்றில் 63 இடங்களில் மட்டுமே சிறுதொழில் வளர்ச்சி வங்கியான சிட்பிக்கு கிளைகள் இருப்பதை அறிந்தோம்.