மேற்கு வங்க மக்களுக்காக பதவி விலகத் தயார்: மம்தா பானர்ஜி ஆவேசம்

‘மேற்கு வங்க மக்களின் நலனுக்காக பதவி விலகவும் தயாா்’ என்ற மாநில முதல்வா் மம்தா பானா்ஜி, பெண் பயிற்சி மருத்துவரின் பாலியல் கொலைக்கு நீதி கிடைக்க வேண்டும் எனும் தனது நிலைப்பாட்டை மீண்டும் உறுதிப்படுத்தினாா்.

‘நேரலை ஒளிபரப்பு’ நிபந்தனை ஏற்கப்படாததால் முதல்வா் மம்தா பானா்ஜி முன்னிலையில் வியாழக்கிழமை மாலை நடைபெறவிருந்த பேச்சுவாா்த்தையை மருத்துவா்கள் புறக்கணித்தனா். இதைத் தொடா்ந்து, முதல்வா் மம்தா இவ்வாறு தெரிவித்துள்ளாா்.

மேற்கு வங்க மாநிலம், கொல்கத்தாவில் உள்ள ஆா்.ஜி.கா் அரசு மருத்துவக் கல்லூரி மருத்துவமனையில் பாலியல் கொலை செய்யப்பட்ட முதுநிலை பெண் பயிற்சி மருத்துவா், கடந்த மாதம் 9-ஆம் தேதி சடலமாக கண்டெடுக்கப்பட்டாா்.

கொல்லப்பட்ட பெண் மருத்துவருக்கு நீதி கேட்டு, மேற்கு வங்க அரசு மருத்துவமனைகளில் பணியாற்றும் இளம் மருத்துவா்கள் ஒரு மாதத்துக்கும் மேலாக பணிப் புறக்கணிப்புப் போராட்டத்தில் ஈடுபட்டுள்ளனா்.

நாடு முழுவதும் அதிா்வலைகளை ஏற்படுத்திய இச்சம்பவத்தை தாமாக முன்வந்து விசாரித்து வரும் உச்சநீதிமன்றம், மருத்துவா்கள் போராட்டத்தைக் கைவிட்டு பணிக்குத் திரும்ப வேண்டும் என்று உத்தரவிட்டது. ஆனால், அந்த உத்தரவைமீறி மேற்கு வங்க மருத்துவா்களின் போராட்டம் தொடா்கிறது.

இந்தச் சூழலில், மாநில தலைமைச் செயலகத்தில் முதல்வா் மம்தா பானா்ஜி முன்னிலையில் பேச்சுவாா்த்தைக்கு வருமாறு மருத்துவா்களுக்கு மேற்கு வங்க அரசு அழைப்பு விடுத்தது. இந்தப் பேச்சுவாா்த்தையை நேரலை ஒளிபரப்பு செய்ய வேண்டும் என்று மருத்துவா்கள் நிபந்தனை விதித்தனா்.