8 உயர்நீதிமன்றங்களுக்கு புதிய தலைமை நீதிபதிகள்

சென்னை, தில்லி உயர்நீதிமன்றங்கள் உள் பட நாடு முழுவதும் எட்டு உயர்நீதிமன்றங்களின் தலைமை நீதிபதி நியமனத்துக்கான அறிவிக்கையை மத்திய அரசு சனிக்கிழமை வெளியிட்டது.

இதற்குறித்த குடியரசுத் தலைவரின் பணி நியமன அறிவிக்கை விவரத்தை மத்திய சட்டத் துறை இணை அமைச்சர் அர்ஜுன் ராம் மேக்வால் தனது எக்ஸ் பக்கத்தில் சனிக்கிழமை வெளியிட்டார்.

அதன்படி, சென்னை உயர்நீதிமன்றத் தலைமை நீதிபதியாக மும்பை உயர்நீதிமன்ற மூத்த நீதிபதி கே.ஆர்.ஸ்ரீராம், தில்லி உயர் நீதிமன்றத் தலைமை நீதிபதியாக தற்போதைய பொறுப்பு தலைமை நீதிபதி மன்மோகன், ஹிமாசல பிரதேச உயர்நீதிமன்றத் தலைமை நீதிபதியாக தற்போதைய தில்லி உயர் நீதிமன்ற மூத்த நீதிபதி ராஜீவ் ஷக்தர், மத்திய பிரதேச உயர்நீதிமன்றத் தலைமை நீதிபதியாக தில்லி உயர் நீதிமன்ற நீதிபதி சுரேஷ் குமார் கெயித், மேகாலய உயர்நீதிமன்றத் தலைமை நீதிபதியாக கொல்கத்தா உயர்நீதிமன்ற நீதிபதி இந்திர பிரசன்னாமுகர்ஜி, கேரள உயர்நீதிமன்றத் தலைமை நீதிபதியாக மும்பை உயர்நீதிமன்ற நீதிபதி நிதின் மதுகர் ஜாம்தார், ஜம்மு-காஷ்மீர் மற்றும் லடாக் உயர்நீதிமன்றத் தலைமை நீதிபதியாக அந்த நீதிமன்றத்தில் தற்போது நீதிபதியாக உள்ள தாஷி ரப்ஸ்தான், ஜார்க்கண்ட் மாநில உயர்நீதிமன்ற தலைமை நீதிபதியாக தற்போதைய ஹிமாசல பிரதேச தலைமை நீதிபதி எம்.எஸ். ராமச்சந்திர ராவ் ஆகியோரின் பெயர்கள் நியமன அறிவிக்கையில் இடம்பெற்றுள்ளன.

முன்னதாக, உயர்நீதிமன்றத் தலைமை நீதிபதிகள் நியமனம் தொடர்பாக உச்சநீதிமன்ற கொலீஜியம் கடந்த ஜூலை 11-ஆம் தேதி தனது பரிந்துரைகளை மத்திய அரசுக்கு வழங்கியிருந்தது.