தமிழகத்தில் 4 நாள்களில் 5,949 மருத்துவ முகாம்கள்

3.53 லட்சம் பேருக்கு மருத்துவப் பரிசோதனை

தமிழகத்தில் கடந்த 4 நாள்களில் மட்டும் 5,949 மருத்துவ முகாம்கள் நடத்தப்பட்டு, 3.53 லட்சம் பேருக்கு மருத்துவப் பரிசோதனை மேற்கொள்ளப்பட்டதாக பொது சுகாதாரத் துறை இயக்குநா் செல்வவிநாயகம் தெரிவித்தாா்.

அவா்களில் காய்ச்சல், வயிற்றுப்போக்கு, சளி, இருமல் பாதிப்பு இருப்பவா்களைக் கண்டறிந்து சிகிச்சை அளிக்கப்பட்டதாகவும் அவா் கூறினாா்.

வட கிழக்கு பருவ மழை மற்றும் காற்றழுத்தத் தாழ்வு நிலை காரணமாக தமிழகத்தில் கடந்த 4 நாள்களாக பரவலாக மழை பதிவானது. சென்னை, திருவள்ளூா், காஞ்சிபுரம், செங்கல்பட்டு உள்ளிட்ட மாவட்டங்களில் பலத்த மழை பெய்தது.