ரயில்வே இடஒதுக்கீடு: முறையாக பராமரிக்க ரயில்வே வாரியம் அறிவுறுத்தல்

ரயில்வே துறையின் அனைத்து (17) மண்டலங்களுக்கும் அதன் பொதுத்துறை நிறுவனங்களுக்கும் பட்டியலின (எஸ்சி), பழங்குடியின (எஸ்டி) மற்றும் இதர பிற்படுத்தப்பட்டோர் (ஓபிசி) பிரிவுகளின் ரோஸ்டர் இடஒதுக்கீடு விதிகளை முறையாக பராமரிக்க ரயில்வே வாரியம் அறிவுறுத்தியுள்ளது.

ரோஸ்டர் முறை என்பது, எஸ்சி, எஸ்டி மற்றும் ஓபிசி பிரிவினருக்கு பணியிடங்கள் மற்றும் கல்வி நிறுவனங்களில் இடஒதுக்கீட்டை உறுதி செய்கிறது. வெளிப்படைத்தன்மையை அதிகரிக்கும் வகையில் புள்ளிகளின் அடிப்படையில் இடஒதுக்கீடு நடைபெறுகிறது.

கடந்த செப்டம்பர் 9-ஆம் தேதி நடைபெற்ற பிற்படுத்தப்பட்ட வகுப்பினருக்கான நாடாளுமன்றக் குழு கூட்டத்தில், ரயில்வே துறையில் குறிப்பாக அதன் பொதுத்துறை நிறுவனங்களில் இட ஒதுக்கீடு விதிகளை முறையாக அமல்படுத்துவது மற்றும் இடஒதுக்கீட்டு ரோஸ்டரை (பட்டியலை) பராமரிப்பது குறித்து பல்வேறு உறுப்பினர்களால் கேள்விகள் எழுப்பப்பட்டது.

இது தொடர்பாக கடந்த மே மாதமே அனைத்து ரயில்வே மண்டலங்களுக்கும் தற்போதுள்ள இடஒதுக்கீடு கொள்கைகளை முறையாக செயல்படுத்துவதையும், ஆள்சேர்ப்பு மற்றும் பதவி உயர்வுகளில் இட ஒதுக்கீடு பட்டியலை பராமரிப்பதையும் உறுதி செய்யுமாறு வாரியம் வலியுறுத்தியது.