விமானங்களுக்கு வெடிகுண்டு மிரட்டல் தவறான தகவல்களை உடனடியாக நீக்க சமூக ஊடகங்களுக்கு அரசு அறிவுறுத்தல்

விமானங்களுக்கு தொடர்ந்து வெடிகுண்டு மிரட்டல்கள் விடுக்கப்படும் நிலையில், தகவல் தொழில்நுட்ப விதிகளுக்கு உட்பட்டு, தவறான தகவல்களை உடனடியாக நீக்குமாறு சமூக ஊடகங்களுக்கு தகவல் தொழில்நுட்ப அமைச்சகம் அறிவுறுத்தியுள்ளது.

மேலும், நாட்டின் ஒற்றுமை, ஒருமைப்பாடு, இறையாண்மை அல்லது பாதுகாப்புக்கு அச்சுறுத்தல் ஏற்படுத்தும் வகையிலான தவறான செய்திகளை சமூக வலைதளங்களில் பரப்புவோர் குறித்த தகவல்களை பாரதிய நாகரிக் சுரக்ஷா சன்ஹிதா, 2023 சட்டத்தின்படி அரசுக்கு உடனடியாக தெரிவிக்குமாறு அறிவுறுத்தப்பட்டுள்ளது.

30-க்கும் மேற்பட்ட விமானங்களுக்கு சனிக்கிழமை வெடிகுண்டு மிரட்டல் விடுக்கப்பட்டது. இத்துடன் கடந்த இரு வாரங்களாக இந்திய நிறுவனங்களால் இயக்கப்படும் 300-க்கும் மேற்பட்ட விமானங்களுக்கு சமூக வலைதளங்கள் மூலம் தொடர்ந்து வெடிகுண்டு மிரட்டல் விடுக்கப்பட்டுள்ளது.

இதனால் விமானம் புறப்பாடு/தரையிறக்கத்தில் தாமதம், அட்டவணை மாற்றம், பாதுகாப்பு சோதனைகள் உள்ளிட்ட பல்வேறு நடவடிக்கைகள் மேற்கொள்ளப்பட்டு வருகின்றன. இந்த மிரட்டல்கள் அனைத்தும் புரளியாகவே இருந்தாலும், அவற்றை உடனடியாக நீக்க வேண்டியது அவசியம்.