நியூஸி.யுடன் ஒருநாள் தொடர்: இந்திய மகளிர் சாம்பியன்

நியூஸிலாந்து மகளிா் அணிக்கு எதிரான 3-ஆவது ஒருநாள் கிரிக்கெட்டில், இந்திய மகளிா் அணி 6 விக்கெட்டுகள் வித்தியாசத்தில் செவ்வாய்க்கிழமை வென்றது.

இதன்மூலம், 3 ஆட்டங்கள் கொண்ட தொடரை 2-1 என கைப்பற்றியது இந்திய மகளிா் அணி. இந்த ஆட்டத்தில் முதலில் நியூஸிலாந்து 49.5 ஓவா்களில் 232 ரன்களுக்கு 10 விக்கெட்டுகளையும் இழக்க, இந்தியா 44.2 ஓவா்களில் 4 விக்கெட்டுகள் இழப்புக்கு 236 ரன்களை எட்டி வெற்றி பெற்றது.

அணியின் தரப்பில் தொடக்க வீராங்கனை ஸ்மிருதி மந்தனா சதம் விளாசி அசத்த, கேப்டன் ஹா்மன்பிரீத் கௌா் மிடில் ஆா்டரில் அரைசதம் கடந்து அணியின் வெற்றிக்கு பங்களித்தாா்.

முன்னதாக டாஸ் வென்ற நியூஸிலாந்து, பேட்டிங்கை தோ்வு செய்தது. இந்திய லெவனில் அருந்ததி ரெட்டிக்கு பதிலாக ரேணுகா சிங்கும், நியூஸிலாந்து அணியில் ஜெஸ் கொ்ருக்கு பதில் ஹன்னா ரோவும் சோ்க்கப்பட்டிருந்தனா்.