கோவா எம்எல்ஏக்கள் தகுதிநீக்கம் நிராகரிப்பு: உயர்நீதிமன்றத்தை அணுக காங்கிரஸ் முடிவு

கோவாவில் ஆளும் பாஜகவில் இணைந்த 8 காங்கிரஸ் எம்எல்ஏ-க்களுக்கு எதிரான தகுதிநீக்க மனுவை பேரவைத் தலைவர் ரமேஷ் தாவத்கர் நிராகரித்ததற்கு எதிராக உயர்நீதிமன்றத்தை நாட காங்கிரஸ் முடிவெடுத்துள்ளது.

கோவா காங்கிரஸ் எம்எல்ஏ-க்கள் திகம்பர் காமத், அலிக்சோ செகியூரா, சங்கல்ப் அமோங்கர், மைக்கேல் லோபோ, டெலிலாலோபோ, கேதர் நாயக், ருடால்ஃப் பெர்னாண்டஸ், ராஜேஷ் ஃபல்தேசாய் ஆகிய 8 பேர் கடந்த 2022-ஆம் ஆண்டு பாஜகவில் இணைந்தனர்.

அவர்களை தகுதிநீக்கம் கோரி கோவா பேரவைத் தலைவரிடம் அப்போதைய பிரதேச காங்கிரஸ் தலைவர் கிரிஷ் சோடங்கர் மனு அளித்திருந்தார்.

இந்த மனுவை நிராகரித்த பேரவைத் தலைவர் தாவத்கர், 'தேர்தலில் தேர்ந்தெடுக்கப்பட்ட உறுப்பினர் சார்ந்திருக்கும் அரசியல் கட்சி வேறொரு அரசியல் கட்சியுடன் இணைக்கப்பட்டால் அந்த உறுப்பினர் தகுதி நீக்கத்தை எதிர்கொள்ள மாட்டார்' என்று தெரிவித்துள்ளார்.