அமெரிக்காவின் புதிய அதிபர் யார்?

அமெரிக்காவின் புதிய அதிபரை தேர்ந்தெடுப்பதற்கான வாக்குப் பதிவு செவ்வாய்க்கிழமை விறுவிறுப்பாக நடைபெற்றது. புதிய அதிபர் டொனால்ட் டிரம்பா, கமலா ஹாரிஸா என்பது விரைவில் தெரியவரும்.

அமெரிக்க அதிபர் தேர்தல் 4 ஆண்டுகளுக்கு ஒருமுறை நடைபெறுகிறது. நிகழாண்டு அந்தத் தேர்தலில் ஜனநாயக கட்சி வேட்பாளராக முதலில் அந்நாட்டின் தற்போதைய அதிபர் ஜோ பைடன் அறிவிக்கப்பட்டார். குடியரசு கட்சி வேட்பாளராக அந்நாட்டின் முன்னாள் அதிபர் டொனால்ட் டிரம்ப் போட்டியிடுகிறார்.

எனினும் வயது முதிர்வு காரணமாக பைடனின் செயல்திறனில் சுணக்கம் ஏற்பட்டதால், தேர்தலையொட்டி டிரம்ப் உடனான நேரடி விவாதத்தில் பைடன் மிகவும் தடுமாறியது விமர்சனங்களுக்கு வழிவகுத்தது. இதன் காரணமாக அதிபர் தேர்தல் போட்டியில் இருந்து பைடன் விலக வேண்டும் என்று அவரின் சொந்தக் கட்சியினரே அழுத்தம் அளித்தனர். இதையடுத்து, அதிபர் தேர்தல் போட்டியில் இருந்து பைடன் விலகினார். இதைத் தொடர்ந்து, ஜனநாயக கட்சி வேட்பாளராக அந்நாட்டின் தற்போதைய துணை அதிபர் கமலா ஹாரிஸ் அறிவிக்கப்பட்டார்.

அமெரிக்க புதிய அதிபரை தேர்ந்தெடுக்க வாக்குப் பதிவு நாளுக்கு முன்பாகவே வெவ்வேறு நாள்களில் முன்கூட்டியே வாக்களிக்கும் வசதி அந்நாட்டில் உள்ளது. இந்த நடைமுறையின் படி, வாக்குப் பதிவு மையங்களில் நேரடியாகவும், தபால் வாக்குகளையும் வாக்காளர்கள் செலுத்துவது வழக்கம். இதன்மூலம், தேர்தல் நாளன்று மோசமான வானிலை, வாக்களிக்க நீண்ட வரிசையில் காத்திருத்தல், வாக்குப் பதிவு நாளன்று ஏற்படக்கூடிய எதிர்பாராத சிக்கல்கள் உள்ளிட்டவற்றை வாக்காளர்கள் தவிர்க்க முடியும். இதன்படி 8.2 கோடிக்கும் மேற்பட்டவர்கள் முன்கூட்டியே வாக்களித்தனர்.