உ.பி.யில் மதரஸாக்களை மூடுவதற்கான உயர்நீதிமன்ற உத்தரவு ரத்து

மதரஸாக்களை மூட மாநில அரசை அறிவுறுத்தி அலாகாபாத் உயர்நீதிமன்றம் பிறப்பித்த உத்தரவை ரத்து செய்த உச்சநீதிமன்றம், இதுதொடர்பாக உத்தர பிரதேச அரசு கடந்த 2004-ஆம் ஆண்டு இயற்றிய மதரஸா கல்வி வாரிய சட்டம் செல்லும் என்றும் செவ்வாய்க்கிழமை தீர்ப்பளித்தது.

இதன் மூலம், உத்தர பிரதேச மதரஸா கல்வி வாரிய சட்டத்தின் கீழ் மாநிலம் முழுவதும் செயல்படும் 16,000 மதரஸாக்களில் பயின்றுவரும் 17 லட்சம் முஸ்லிம் மாணவ, மாணவிகளின் நலன் காக்கப்பட்டுள்ளது.

உத்தர பிரதேச மாநிலத்தில் சமாஜவாதி கட்சி ஆட்சியின்போது 'உத்தர பிரதேச மதரஸா கல்வி வாரிய சட்டம் 2004' என்ற சட்டம் கொண்டுவரப்பட்டது. இதன் கீழ், மாநிலத்தில் செயல்பட்டு வந்த 16,000 மதரஸாக்களில் வழங்கப்பட்ட படிப்புகள் அங்கீகரிக்கப்பட்டன. அதன் மூலம், பல லட்சம் இஸ்லாமிய மாணவர்கள் மதரஸாக்களில் படித்து வந்தனர்.

இந்த நிலையில், இந்த சட்டத்தின் அரசமைப்புச் சட்ட அங்கீகாரத்துக்கு எதிராகவும், மதரஸாக்களை கல்வித்துறையின்றி, சிறுபான்மை நலத்துறை நிர்வகிப்பதற்கு எதிராகவும் வழக்குரைஞர் அன்ஷுமன் சிங் ரத்தோர் அலாகாபாத் உயர்நீதிமன்றத்தில் மனு தாக்கல் செய்தார்.

இந்த மனுவை அண்மையில் விசாரித்த அலாகாபாத் உயர்நீதிமன்றம், 'உத்தர பிரதேச மதரஸா கல்வி வாரியச் சட்டம் அரசமைப்புச் சட்டத்துக்கு எதிரானது' என்று உத்தரவிட்டது.

மேலும், 'இச் சட்டம் மதச்சார்பின்மை கொள்கையை மீறும் வகையில் அமைந்துள்ளது' என்று குறிப்பிட்ட உயர்நீதிமன்றம், அவற்றில் பயின்றுவரும் மாணவர்களை முறையான பள்ளிக் கல்வி முறைக்கு மாற்ற வேண்டும் என்று மாநில அரசுக்கு உத்தரவிட்டது.