காவிரி நீரை சிக்கனமாகப் பயன்படுத்துங்கள்: 4 மாநிலங்களுக்கும் ஆணையம் அறிவுறுத்தல்

காவிரி நீரை பகிர்ந்து கொள்ளும் தமிழகம் உள்ளிட்ட 4 மாநிலங்களும் தண்ணீரை சிக்கனமாகப் பயன்படுத்த காவிரி நீர் மேலாண்மை ஆணையம் புதன்கிழமை அறிவுறுத்தியது.

காவிரி நீர் மேலாண்மை ஆணையத்தின் (சி.டபிள்யு.எம்.ஏ.) 35-ஆவது கூட்டம் ஆணையத்தின் தலைவர் எஸ்.கே.ஹல்தார் தலைமையில் தில்லியில் நடைபெற்றது. இதில் தமிழக உறுப்பினரும், நீர்வளத் துறைச் செயலருமான கே.மணிவாசன், காவிரி தொழில் நுட்பக் குழுத் தலைவர் ஆர். சுப்பிரமணியன் மற்றும் மத்திய அமைச்சக துறைகளின் பிரதிநிதிகளும் கலந்து கொண்டனர்.

இக்கூட்டத்தில் காவிரிப் படுகையில் உள்ள நீர்நிலை, வானிலை நிலைகள் குறித்த விவாதமும் 2024-2025 நீர் ஆண்டில் தமிழகத்திற்கு பிலிகுண்டுலுவிலும் மற்றும் காரைக்கால் பிராந்தியத்திற்கு ஒட்டுமொத்தமாக வழங்கப்பட்ட தண்ணீர் தரவுகள் குறித்து விவாதிக்கப்பட்டது.

ஆணையக் கூட்டத்தில் காணொலி வழியாக கர்நாடக நீர்வளத் துறை செயலர் கெüரவ் குப்தா பங்கேற்று, தமிழகத்திற்கு வழங்க வேண்டிய அளவை விட கூடுதலாக தண்ணீர் வழங்கப்பட்டதாகத் தெரிவித்தார்.