குழந்தைகள் கல்விச் செலவை அரசு ஏற்கும்

பட்டாசு ஆலை விபத்துகளில் உயிரிழந்தவர்களின் குழந்தைகளின் உயர் கல்வி வரையிலான கல்விச் செலவை முழுமையாக தமிழக அரசு ஏற்கும் என முதல்வர் மு.க.ஸ்டாலின் அறிவித்தார்.

- முதல்வர் மு.க.ஸ்டாலின்

விருதுநகரில் ரூ.77.12 கோடி மதிப்பில் கட்டப்பட்ட புதிய ஆட்சியர் அலுவலகக் கட்டிடம் மற்றும் ரூ.21.36 கோடி மதிப்பில் பல்வேறு துறைகளின் சார்பில் கட்டி முடிக்கப்பட்ட 34 பணிகளை முதல்வர் ஸ்டாலின் ஞாயிற்றுக்கிழமை திறந்து வைத்தார்.

இதைத் தொடர்ந்து, பட்டம்புதூரில் நடைபெற்ற அரசு விழாவில் 57,556 பயனாளிகளுக்கு ரூ.417.21 கோடி மதிப்பிலான நலத்திட்ட உதவிகளை வழங்கி முதல்வர் ஸ்டாலின் பேசியதாவது:

விருதுநகர் என்றாலே அனைவருக்கும் நினைவுக்கு வருபவர் தியாகி சங்கரலிங்கனார். அவர் 'மெட்ராஸ் ஸ்டேட்' என்று அழைக்கப்பட்டதை 'தமிழ்நாடு' எனப் பெயர் சூட்டக் கோரி உண்ணாவிரதம் இருந்து உயிர் நீத்தவர். தற்போது நாம் தமிழ்நாடு எனப் பெருமையுடன் அழைப்பதற்கு அவரும், அண்ணாவும் முக்கியக் காரணமாக இருந்தனர்.

ஈரோட்டிலிருந்து பெரியார், காஞ்சிபுரத்திலிருந்து அண்ணா, திருவாரூரிலிருந்து கருணாநிதி, விருதுநகரிலிருந்து காமராஜர் ஆகிய தலைவர்கள் உருவாகினர்.