ஓபிசி பிரிவினர் இடையே மோதலைத் தூண்ட காங்கிரஸ் முயற்சி

பொகாரோ, நவ. 10: இதர பிற்படுத்தப்பட்ட பிரிவினர் (ஓபிசி) இடையே மோதலைத் தூண்ட காங்கிரஸ் முயற்சிக்கிறது என்று பிரதமர் நரேந்திர மோடி குற்றம்சாட்டினார்.

ஒற்றுமையே பாதுகாப்பு என்ற உணர்வுடன் ஓபிசி பிரிவினர் செயல்பட வேண்டும் என்றும் அவர் கேட்டுக் கொண்டார்.

நாடு முழுவதும் ஜாதிவாரி கணக்கெடுப்பு நடத்த வேண்டும் என்று மக்களவை எதிர்க்கட்சித் தலைவர் ராகுல்காந்தி தொடர்ந்து வலியுறுத்தி வரும் நிலையில் பிரதமர் மோடி இந்த குற்றச்சாட்டைக் கூறியுள்ளது கூடுதல் முக்கியத்துவம் பெற்றுள்ளது.

ஜார்க்கண்டில் ஞாயிற்றுக்கிழமை தேர்தல் பிரசாரம் மேற்கொண்ட பிரதமர் மோடி பொகாரோவில் பொதுக் கூட்டத்தில் பேசியதாவது:

காங்கிரஸ் மத்தியில் ஆட்சியில் இருந்த வரை இதர பிற்படுத்தப்பட்ட பிரிவினர், தாழ்த்தப்பட்டோர், பழங்குடியினர் இடையே பிரிவினையைத் தூண்டிவிட்டு வந்தது. இப்போதுவரை அவர்களிடையே இணக்கத்தை ஏற்படுத்துவதில் பல்வேறு பிரச்னைகள் உள்ளன.

இதர பிற்படுத்தப்பட்டோர், தாழ்த்தப்பட்டோர், பழங்குடியினர் ஒற்றுமையாக இருந்தால் தங்கள் கட்சி வீழ்ச்சியடையும் என்பது காங்கிரஸுக்குத் தெரியும். எனவேதான் காங்கிரஸை கட்டுப்பாட்டில் வைத்துள்ள ஒரு குடும்பத்தினர் மக்களின் ஒற்றுமையைத் தொடர்ந்து சீர்குலைக்கின்றனர்.