எதிர்க்கட்சி எம்எல்ஏ-க்களை விலை பேசுகிறார் பிரதமர் மோடி!

பிரதமர் மோடி எதிர்க்கட்சிகளை அடக்கி ஒடுக்கி, பாஜக அல்லாத பிற மாநில அரசுகளை கவிழ்க்க ஆடுகளைப் போல் எம்எல்ஏக்களை விலை கொடுத்து வாங்கி வருகிறார் என காங்கிரஸ் தேசிய தலைவர் மல்லிகார்ஜுன கார்கே திங்கள்கிழமை விமர்சித்தார்.

81 இடங்களைக் கொண்ட ஜார்க்கண்ட் மாநில சட்டப்பேரவைக்கு நவம்பர் 13, 20-ஆகிய தேதிகளில் இரு கட்டங்களாக தேர்தல் நடைபெறுகிறது.

ராஞ்சியில் நடைபெற்ற காங்கிரஸ் பொதுக்கூட்டத்தில் கலந்து கொண்டு கார்கே பேசியதாவது: பிரதமர் மோடி, உள்துறை அமைச்சர் அமித் ஷா தவிர தொழிலதிபர்கள் அதானி மற்றும் அம்பானி என நான்கு பேர் தற்போது இந்தியாவை இயக்கி வருகின்றனர். நானும், ராகுல் காந்தியும் அவர்களிடம் இருந்து அரசமைப்பையும், ஜனநாயகத்தையும் காப்பாற்ற போராடி வருகிறோம்.