பேச்சு சுதந்திரம் பறிப்பு: பிரதமர் மோடி மீது கார்கே குற்றச்சாட்டு

"பிரதமர் நரேந்திர மோடியின் தவறுகளை சுட்டிக்காட்டுபவர்கள் சிறையில் அடைக்கப்படுகின்றனர். இதன்மூலம் நாட்டில் பேச்சு சுதந்திரத்தை பிரதமர் பறித்து விட்டார்" என்று காங்கிரஸ் தலைவர் மல்லிகார்ஜுன கார்கே குற்றஞ்சாட்டினார்.

ஜார்க்கண்ட் மாநிலம், ராஞ்சியில் தேர்தல் பிரசாரத்தில் சனிக்கிழமை ஈடுபட்ட கார்கே பேசியதாவது: மாநிலத்தில் ஆளும் ஜார்க்கண்ட் முக்தி மோர்ச்சா கட்சியிலிருந்து விலகி பாஜகவில் இணைந்த மாநில முன்னாள் முதல்வர் சம்பயி சோரன், ஒரு துரோகி. இவரைப்போல, பலர் தங்களை வளர்த்தவர்களுக்கே துரோகம் செய்கின்றனர். நாட்டில் பேச்சு சுதந்திரத்தை பிரதமர் மோடி நீக்கிவிட்டார். அவரின் தவறுகளை சுட்டிக்காட்டுபவர்கள் சிறையில் அடைக்கப்படுகின்றனர். இதன்மூலம் மக்களின் உரிமைகளை மத்தியில் ஆளும் பாஜக பறிக்கிறது. பழங்குடியின முதல்வரை சிறையில் அடைப்பது தான் ஜனநாயகமா? அவர்கள் நம்மை நசுக்கப் பார்க்கின்றனர். ஆனால், நாம் தொடர்ந்து எழுவோம்.