மருத்துவர்களின் அணுகுமுறையிலும் மாற்றம் தேவை!

சென்னை கிண்டியில் உள்ள கலைஞர் நூற்றாண்டு மருத்துவமனை மருத்துவர் பாலாஜி கத்தியால் குத்தப்பட்ட சம்பவம் தமிழகம் முழுவதும் பெரும் அதிர்வலையை ஏற்படுத்தியிருக்கிறது.

- ஏ.வி. பெருமாள்

இந்த சம்பவத்தின் எதிரொலியாக தமிழகம் முழுவதும் உள்ள அரசு மருத்துவமனைகளில் பாதுகாப்பை மேம்படுத்துவதற்கு தீவிர நடவடிக்கையை எடுத்து வருகிறது தமிழக அரசு.

மனித உயிர்களைக் காக்கும் மகத்தான பணியை மேற்கொள்ளும் மருத்துவர்கள் மீதான தாக்குதல் என்பது எந்த விதத்திலும் சகித்துக்கொள்ள முடியாத ஒன்றுதான். அதேநேரத்தில் புனிதமான மருத்துவ சேவையில் ஈடுபட்டிருக்கும் அரசு மருத்துவர்கள் அனைவரும் அரசு மருத்துவமனைகளுக்கு வரும் நோயாளிகளிடம் மனிதநேயத்தோடு நடந்து கொள்கிறார்களா என்ற கேள்வியும் எழுகிறது.

அரசு மருத்துவமனைகளில் நோயாளிகளால் கடவுளாகப் பார்க்கப்படும் எத்தனையோ மருத்துவர்கள் இப்போதும் இருக்கத்தான் செய்கிறார்கள். அதேநேரத்தில் மருத்துவர் மீது தாக்குதல் தொடுத்த நபரின் தாயார் கூறியதைப் போன்ற சம்பவங்கள் அரசு மருத்துவமனைகளுக்கு வரும் நோயாளிகளுக்கு காலம்காலமாக நடந்து கொண்டுதான் இருக்கின்றன.

அரசு மருத்துவமனைகள்தான் கதியென்று ஆகிவிட்ட ஏழை எளியோரே இதற்கு சாட்சி. இதனை மனசாட்சியுள்ள மருத்துவர்களால் மறுக்க முடியுமா?