மாநிலங்களுக்கு 50% வரிப் பகிர்வு

நிதி ஆணையக் குழுவிடம் முதல்வர் ஸ்டாலின் வலியுறுத்தல்

மத்திய வருவாயில் மாநிலங்களுக்கான வரிப் பகிர்வை 50 சதவீதமாக உயர்த்த பரிந்துரை செய்ய வேண்டுமென 16-ஆவது நிதி ஆணையக் குழுவிடம் முதல்வர் மு.க.ஸ்டாலின் வலியுறுத்தினார்.

16-ஆவது நிதி ஆணையக் குழு நான்கு நாட்கள் பயணமாக சென்னைக்கு ஞாயிற்றுக்கிழமை (நவ.17) வந்தது. முதல்வர் மு.க. ஸ்டாலின், அமைச்சர்கள், அரசுத் துறை அதிகாரிகளுடன் நிதி ஆணையக் குழு திங்கள்கிழமை (நவ.18) ஆலோசனை நடத்தியது.

அப்போது, தமிழகத்தின் நலன் சார்ந்த கோரிக்கைகள் அடங்கிய மனுவை நிதி ஆணையத்தின் தலைவர் அரவிந்த் பனகாரியா மற்றும் உறுப்பினர்களிடம் முதல்வர் ஸ்டாலின் அளித்தார்.

இதைத் தொடர்ந்து நடைபெற்ற ஆலோசனைக் கூட்டத்தில் முதல்வர் ஸ்டாலின் பேசியதாவது: இந்தியாவிலுள்ள அனைத்து மாநிலங்களின் தேவைகள், எதிர்பார்ப்புகளை நிறைவு செய்து இந்தியாவை உலகின் பொருளாதார வல்லரசு நாடாக மாற்றும் வகையில் 16-ஆவது நிதி ஆணையக் குழுவின் பரிந்துரைகள் அமையும் என நம்புகிறேன்.

சுகாதாரம், கல்வி, சமூகநலம், வேளாண்மை போன்ற துறைகளின் முன்னேற்றத்துக்கான பல முக்கியத் திட்டங்களை வடிவமைத்து நடைமுறைப்படுத்துவதற்கான பொறுப்புகளை பெரும்பாலும் மாநில அரசுகள்தான் நிறைவேற்றி வருகின்றன. ஆனால், அதற்கு மாறாக இந்தப் பொறுப்புகளை நிறைவேற்றத் தேவையான வருவாயைப் பெருக்குவதற்கான அதிகாரங்கள் மாநில அரசுகளிடம் குறைவாகவே உள்ளன.