நெதன்யாகுவை கைது செய்ய சர்வதேச நீதிமன்றம் உத்தரவு

காஸாவில் போர்க் குற்றத்தில் ஈடுபட்டதாக இஸ்ரேல் பிரதமர் பெஞ்சமின் நெதன்யாகு, அந்த நாட்டு முன்னாள் பாதுகாப்புத் துறை அமைச்சர் யோவாவ் கலான்ட் ஆகியோருக்கு எதிராக சர்வதேச குற்றவியல் நீதிமன்றம் கைது உத்தரவு பிறப்பித்துள்ளது.

இது தவிர, கடந்த ஆண்டு அக்டோபர் 7-ஆம் தேதி இஸ்ரேலில் நடத்திய தாக்குதல் தொடர்பாக ஹமாஸ் தலைவர்களுக்கு எதிராகவும் அந்த நீதிமன்றம் கைது உத்தரவு பிறப்பித்துள்ளது.

காஸாவில் நெதன்யாகும் யோவாவ் கலான்டும் படுகொலைகள், வேண்டுமென்றே பொதுமக்கள் மீது தாக்குதல் நடத்துவது போன்ற போர்க் குற்றத்தில் ஈடுபடுவதால் அவர்களை சர்வதேச குற்றவியல் நீதிமன்றம் கைது செய்து விசாரணை நடத்த வேண்டும் என்று அந்த நீதிமன்றத்தின் வழக்குரைஞர் கரீம் கான் கடந்த மே மாதம் கோரிக்கை விடுத்திருந்தார். அப்போது அவர் வெளியிட்ட அறிக்கையில், காஸா மக்கள் உயிர்வாழ்வதற்குத் தேவையான அத்தியாவசியப் பொருள்கள் அவர்களுக்குக் கிடைக்காமல் இருக்க வேண்டும் என்பதற்காக நெதன்யாகும் கலான்டும் வேண்டுமென்றே திட்டமிட்டு சதி செய்வதாகக் குற்றஞ்சாட்டியிருந்தார்.