நாகை, திருவாரூர், மயிலாடுதுறையில் தொடர் கனமழை

ஒரு லட்சம் ஏக்கர் நெற்பயிர்களை தண்ணீர் சூழ்ந்தது

நாகை, திருவாரூர், மயிலாடுதுறை மாவட்டங்களில் பெய்துவரும் தொடர் கனமழையால், ஒரு லட்சம் ஏக்கரில் பயிரிடப்பட்ட சம்பா, தாளடி நெற்பயிர்களை மழைநீர் சூழ்ந்துள்ளது.

வங்கக் கடலில் உருவாகியுள்ள காற்றழுத்த தாழ்வு நிலை, தாழ்வு மண்டலமாக மாறி டெல்டா மாவட்டங்களை நோக்கி நகர்ந்து வருகிறது. இதன் எதிரொலியாக மயிலாடுதுறை, நாகை, திருவாரூர் மாவட்டங்களில் மிக கனமழை பெய்யும் என வானிலை ஆய்வு மையம் சிவப்பு எச்சரிக்கை விடுத்தது.

அதன்படி, நாகை, திருவாரூர் மாவட்டங்களில் செவ்வாய்க்கிழமை அதிகாலை தொடங்கி நாள் கனமழை பெய்து வருகிறது.

இடைவிடாத மழையால் தாழ்வான பகுதிகளிலும், விளைநிலங்களிலும் தண்ணீர் சூழ்ந்துள்ளது.

குறிப்பாக, நாகை, திருவாரூர் மாவட்டங்களில் 5 லட்சம் ஏக்கருக்கும் அதிகமான பரப்பளவில் சம்பா மற்றும் தாளடி நெற்பயிர்கள் சாகுபடி செய்யப்பட்டுள்ளன. இதில், திருவாரூர் மாவட்டத்தில் சுமார் ஒரு லட்சத்திற்கும் அதிகமான ஏக்கர் பரப்பளவிலும், நாகை மாவட்டத்தில் 50 ஆயிரம் ஏக்கர் பரப்பளவிலும் நெற்பயிர்கள் மழைநீரால் சூழப்பட்டுள்ளன.